Richard Holbrooke, fyrrverandi sendifulltrúi Bandaríkjastjórnar, lést í nótt eftir að hafa í annað sinn gengist undir skurðaðgerða vegna rifu á ósæð. Hann fann fyrir veikindum á föstudag þegar hann átti fund með Hillary Clinton, utanríkisráðherra Bandaríkjanna. 

Holbrooke var sérstakur sendifulltrúi Bandaríkjastjórnar í málefnum Afganistans og Pakistan. Barack Obama, forseti Bandaríkjanna sagði að Holbrooke, sem var 69 ára gamall, og þekktur fyrir að draga stríðandi leiðtoga að samningaborðinu „hefði verið risi í Bandarískri utanríkispólitík“.

Holbrooke sat á fundi með Hillary Clinton í utanríkisráðuneytinu á föstudag þegar hann hné niður. Hann var strax fluttur á sjúkrahús þar sem hann gekkst undir aðgerð vegna rifu á ósæð sem flytur súrefnisríkt blóð að hjartanu.

Andlát Holbrookes á sér stað aðeins viku áður en stjórn Obama tilkynnir um endurskoðaða stefnu í málum Afganistan og Pakistan.

Holbrooke hóf störf í utanríkisþjónustu Bandaríkjanna árið 1962 í tíð John F. Kennedy. Hann varð fyrst heimsþekktur þegar hann vann að friði í Bosníu fyrir hönd Bandaríkjastjórnar. Holbrooke sagði eitt sinn að hann hefði engar efasemdir um að semja við fólk sem hefði gert siðlausa hluti ef það gæti stuðlað að friði.

Washington Post hefur eftir fjölskyldu Holbrookes að eitt af því síðasta sem hann sagði áður en hann fór í skurðaðgerð um helgina hafi verið að það yrði að stöðva stríðið í Afganistan.