Blaðamenn að störfum. Heinz-Peter Bader

42 blaðamenn létust vegna starfs síns á árinu 2010 víðsvegar og reyndist Pakistan vera hættulegasti staður heims fyrir fjölmiðlafólk, samkvæmt rannsókn hinnar bandarísku nefndar til verndar blaðamönnum (Committe to Protect Journalists - CPJ). 

Alls létust 8 blaðamenn við störf sín í Pakistan á árinu, en Írak reyndist næsthættulegast, þar sem fjórir blaðamenn létust. Í Hondúras létust þrír og einnig í Mexíkó. Mun færri blaðamenn létust á vettvangi í ár en árið 2009, þegar 72 blaðamenn létust á heimsvísu. Þar vó þó þungt fjöldamorð á blaðamönnum sem framið var á Filippseyjum.

Til viðbótar við þá 42 blaðamenn sem staðfest er að hafi látist í tengslum við störf sín á árinu eru þó 28 blaðamenn til viðbótar sem létu lífið við óljósar kringumstæður, að sögn CPJ. „Þótt 42 dauðsföll séu minna en á síðustu árum þá er það samt sem áður óásættanleg tala og endurspeglar það ofbeldi sem viðgengst gagnvart fjölmiðlafólki um allan heim," segir framkvæmdastjóri CPJ, Joel Simon.

Flestir blaðamannanna 42 voru myrtir. 40% þeirra létust í átökum eða við aðrar hættulegar kringumstæður. Óvenjumargir létust vegna sjálfsmorðssprengjuárása, bæði í Pakistan, Afganistan, Tælandi og Sómalíu. Í um 90% tilvika leysast morð á blaðamönnum aldrei, samkvæmt CPJ og það þrátt fyrir að stór hluti fórnarlambanna, heil 60% árið 2010, hafi tilkynnt um hótanir í sinn gang stuttu áður en þau voru myrt.