Julian Assange, stofnandi WikiLeaks, fær að vita það á morgun hvort hann verður látinn laus gegn tryggingu. Líkt og fram kom í gær áfrýjuðu sænsk yfirvöld niðurstöðu bresks héraðsdómstóls um að láta Assange lausan gegn tryggingu þar til fjallað hefur verið um beiðni sænskra yfirvalda um að hann verði framseldur til Svíþjóðar vegna ásakana um að hann hafi framið kynferðisbrot þar í landi.  Assange hefur ekki verið ákærður í Svíþjóð en saksóknari hefur óskað eftir því að Assange svari spurningum varðandi ásakanir tveggja kvenna á hendur honum.

Breski dómarinn samþykkti í gær að Assange yrði látinn laus gegn tryggingu, sem nemur 240.000 pundum, 43 milljónum króna. Dómarinn setti  það skilyrði að Assange yrði undir eftirliti og afhenti lögreglunni vegabréf sitt.

Á vef BBC kemur fram að lögmaður Assange, Mark Stephens, segir að tekist hafi að safna um helming tryggingarfjárins og að málið yrði tekið fyrir á efra dómstigi á morgun í síðasta lagi. 

Assange hefur neitað ásökunum kvennanna tveggja í Svíþjóð um að hann hafi misnotað þær kynferðislega. Segir hann að pólitík ráði för og með þessu sé verið að reyna að beina athylginni frá þeim viðkvæmu skjölum sem WikiLeaks hefur birt.

Að sögn Stephens er Assange sakaður um vægt kynferðisbrot og aldrei áður hafi Svíar krafist framsals vegna slíks brots í sögunni.