Sepp Blatter, forseti FIFA, hefur beðist afsökunar á ummælum sem hann lét falla í vikunni um að hommar yrðu að halda sig frá kynlífi ef þeir ætluðu að fara á heimsmeistaramótið í Qatar árið 2022. Samkynhneigð er ólögleg í Qatar.
„Það var ekki ætlun mín og verður aldrei, að taka þátt í neinskonar mismunun,“ sagði Blatter. „Ef einhver finnst á sér brotið þá harma ég það og biðst afsökunar.“
Blatter var fyrr í vikunni spurður hvort það væri eðlilegt að velja Qatar til að halda heimsmeistarakeppnina í fótbolta í ljósi þess að samkynhneigð væri ólögleg í landinu.
„Ég tel að þeir [samkynhneigðir] verði að reyna að hemja kynhvöt sína“ ef þeir ætla að fara á heimsmeistaramótið árið 2022 sagði Blatter og hló. Hann bætti svo við alvarlegur í bragði að hann teldi að ekki yrðu nein vandamál vegna þessa.