Leiðtogar rómversk-kaþólsku kirkjunnar hylmdu yfir með glæpsamlegu háttalagi alræmds barnaníðings og fyrrverandi prests, sem beitti hundruð barna á Írlandi kynferðislegu ofbeldi í tæpa 2 áratugi. Þetta segir í nýrri skýrslu sem birt var í dag.

Skýrslan er afrakstur vinnu sérstakrar rannsóknarnefndar um kynferðisbrot innan kirkjunnar í Dublin og lýsir hún prestinum, Tony Walsh, sem „líklega alræmdasta barnaníðingi" sem rannsóknin beindist að. Í skýrslunni er Vatíkanið harðleg gagnrýnt, sem og leiðtogar kirkjunnar í Dublin og írska lögreglan, fyrir meðhöndlun þeirra á máli Walsh, sem þekktur var sem „syngjandi presturinn" og lagði mikið upp úr Elvis Presley eftirhermum.

Á meðan hann var prestur söng hann með hljómsveit og tengist fjöldi ásakana á hendur honum ofbeldi sem hann beitti börn í tengslum við tónleika sveitarinnar. Árum saman var Walsh fluttur á milli safnaða til að „forðast hneyksli" og hélt hann áfram að beita börn ofbeldi þrátt fyrir að prestar og prelátar, biskupar og erkibiskupar hefðu vitað af gjörðum hans.

Í skýrslunni er m.a. greint frá því að Walsh hafi gengið svo langt að nauðga dreng í safnaðarheimili eftir jarðarför föður hans. Walsh var fyrr í þessum mánuði dæmdur í 16 ára fangelsi, eftir að hann var fundinn sekur um  kynferðisofbeldi gegn þremur drengjum á 8. og 9. áratugnum. Rannsóknarnefndi segist hafa nöfn um fleiri en 40 til viðbótar sem hafi orðið fyrir honum.

Þótt hann noti sjálfur ekki orðalagið kynferðisofbeldi hefur Walsh viðurkennt að hann hafi notað börn til að fá „kynferðislega svölun" á að giska á hálfsmánaðarfresti á 8 ára tímabili. Líklegt er talið að hann hafi í reynd beitt hundruð barna kynferðisofbeldi þótt fæst þeirra hafi stigið fram.