Konurnar sem ásaka Assange
Julian Assange, einn stofnenda WikiLeaks, sætir alvarlegum ásökunum af hálfu tveggja sænskra kvenna. Reuters
Sænsku konurnar tvær sem saka Julian Assange, einn stofnenda WikiLeaks, um nauðgun, kynferðislega áreitni og þvingun eru 31 árs gömul baráttukona fyrir femínisma og 27 ára gamall aðdáandi Assange, samkvæmt heimildum sem AFP fréttastofan vitnar til.
Assange hefur sagt að ásakanir kvennanna séu ófrægingarherferð. Þær hafa staðið utan sviðsljóssins. Önnur er flutt til yfirráðasvæða Palestínumanna og er þar í erindum kristilegra samtaka. Hin hefur lokað símanúmeri sínu.
AFP gefur ekki upp nöfn kvennanna og sænskir saksóknarar hafa ekki birt nöfnin.
Fröken A og fröken W, eins og þær eru kallaðar, voru kallaðar til að bera vitni fyrir fulltrúum bresks dómstóls í Stokkhólmi, en Bretar hafa enn ekki orðið við framsalsbeiðni Svía á Assange. Konurnar tengjast báðar Assange í gegnum viðburð þann 14. ágúst sl.
Þá hélt Assange, sem er 39 ára Ástrali, erindi í Stokkhólmi á ráðstefnu kristilegs hóps innan sænska jafnaðarmannaflokksins. Fröken A vann fyrir hópinn og var óformlegur tengiliður Assange við blaðamenn meðan á heimsókn hans stóð.
Hún leyfði Assange einnig að gista hjá sér frá því hann kom til Stokkhólms 11. ágúst, samkvæmt vitnisburði kvennanna hjá lögreglu sem AFP hefur undir höndum.
Fröken A og Assange höfðu margoft kynmök í eins herbergis íbúð hennar í Stokkhólmi, samkvæmt sænskum götublöðum sem greindu frá smáatriðum sem voru yfirstrikuð í afritum af vitnisburði sem fröken A gaf lögreglunni.
Fulltrúar sænska saksóknarans sögðu við yfirheyrslu breska dómstólsins að „ólögleg þvingun“ hafi farið fram 14. ágúst því þá hafi Assange haldið fröken A fastri á kynferðislegan hátt.
Tilvik sem varð 18. ágúst er flokkað sem „kynferðisleg áreitni“ því þá hafði Assange kynmök við fröken A án þess að nota verju, þrátt fyrir „skýran vilja hennar“ um að verja væri notuð. Breski rétturinn fékk líka að heyra að Assange hafi „viljandi áreitt“ fröken A sama kvöld sem braut gegn henni kynferðislega.
Þrátt fyrir þetta dvaldi Assange áfram í íbúð frökenar A til 20. ágúst og fylgdi henni í samkvæmi 15. ágúst.
Hin 31 árs gamla fröken A lýsir sjálfri sér á bloggi sínu, sem er enn opið, þannig að hún sé „stjórnmálafræðingur, fjölmiðlamaður, frumkvöðull og lausapenni með sérhæfingu í trú og stjórnmálum, jafnréttismálum, femínisma og Rómönsku Ameríku.“
Aðdáun hennar á Nestor Kirchner, fyrrverandi forseta Argentínu, sem kemur fram í meistaraprófsritgerð hennar um Kúbu og bloggfærsla, sem hún er nú búin að fjarlægja, um hvernig á að hefna sín á fyrrverandi kærasta hafa leitt til sögusagna í bloggheimum um hvers vegna hún ákærir Assange.
„CIA útsendari, reiður femínisti/Múslíma-aðdáandi, kristinn bókstafstrúarmaður, lesbía og brjálæðislega ástfangin af manni, getur maður verið þetta allt á sama tíma,“ skrifaði hún á Twitter síðu sinni fyrr í þessum mánuði.
Fröken W, sem er 27 ára, var í hópi áheyrenda á fyrirlestri Assange 14. ágúst. Ekki er vitað jafn mikið um bakgrunn hennar og starf og um meðákæranda hennar. Í skýrslu lögreglunnar er aðdáun hennar á Assange og fundir hennar með honum tíunduð.
Hún sá hann í sjónvarpsviðtali þegar WikiLeaks birtu leyniskjöl Bandaríkjanna um stríðið í Afganistan og sagði lögreglunni að henni hafi þótt hann „áhugaverður, hugrakkur og aðdáunarverður“.
Þegar hún frétti af fyrirlestrinum í Stokkhólmi ákvað hún að mæta og krafðist þess að fá að verja kvöldinu með Assange og vinum eftir fyrirlesturinn. Þau enduðu ein í kvikmyndahúsi. Hún sagði lögreglunni að þau hafi daðrað og hann hafi sagt að honum þætti hún „mjög aðlaðandi“.
Tveimur dögum síðar fóru þau til heimilis frökenar W í Enköping, um 50 km norðvestur af Stokkhólmi. Þau fóru með járnbrautalest og Assange notaði tímann til að lesa um sjálfan sig á Twitter og þegar þau komu til Enköping voru „hrifningin og spennan farin“, eins og hún sagði lögreglunni.
Ásökunin um nauðgun er rakin til atviks sem varð síðar þetta kvöld í heimili frökenar W. Hún sagði breska réttinum að Assange hafi haft kynmök við hana þegar hún var sofandi og notaði hann ekki verju.
Þau borðuðu saman morgunmat morguninn eftir og „í tilraun til að af-dramatísera það sem gerðist“ gerði hún „kaldhæðnar athugasemdir“. Hún fylgdi honum síðan á brautarstöðina og hann lofaði að hringja til hennar.
Claes Borgström verjandi sagði að konurnar tvær hafi komist að því að þær deildu svipaðri reynslu af Assange og farið til lögreglunnar 20. ágúst. „Þær voru ekki vissar um að þær vildu (leggja fram kæru), þær vildu fá ráð,“ og höfðu líka áhyggjur af að hafa smitast af HIV, sagði Borgström blaðamönnum fyrr í mánuðinum.
„Þegar þær sögðu lögreglumanninum, konu, frá þessu þá gerði hún sér grein fyrir því að það sem (konurnar) sögðu henni frá væri glæpur. Hún tilkynnti þetta saksóknara sem ákvað að handtaka Assange,“ sagði verjandinn.
Daginn eftir var málið á forsíðu götublaðsins Expressen og þar með komst hneykslið í hámæli.
Assange hefur ekki veri ákærður. Hann segir að lögfræðingum hans hafi ekki verið sýndar neinar sannanir sem styðji ásakanirnar en saksóknararnir staðhæfa að þær tengist ekki á neinn hátt starfsemi WikiLeaks.
