Branson er hér með Button og Barrichello, ökumönnum Brawn-liðsins í Formúlu-1, sem Virgin-fyrirtækið styður. Reuters

Richard Branson, einn þekktasti athafnamaður Bretlands, telur að breskir athafnamenn séu „ofmenntaðir“ og „of íhaldssamir“ og að þá „skorti ástríðu fyrir frumkvöðlastarfsemi og séu of hræddir við að gera mistök“.

Branson stofnaði hóf atvinnurekstur 15 ára gamall og varð að milljarðamæringi í gegnum fyrirtæki sitt Virgin.

Því hafa þessi ummæli hans vakið athygli en þau lét hann falla í samræðum við fulltrúa bandaríska stjórnvalda, nánar tiltekið Clark Randt, sendiherra Bandaríkjanna í Bretlandi, að því er fram kemur í skjölum WikiLeaks sem sagt er frá á vef Guardian.

Branson telur fjölbreytt störf sín fyrir Virgin ígildi langskólanáms en hann kveðst ungur hafa átt við lesblindu að stríða og átt erfitt með að einbeita sér að námi vegna þeirrar óeirðar sem fylgdi leitandi huga.

Á veg Guardian er bent á að Bill Gates og Paul Allen, stofnendur Microsoft, Steve Jobs, stofnandi Apple, og Mark Zuckerberg, stofnandi Facebook, hafi allir hætt námi til að vinna hugmyndum sínum brautargengi.

Þá hafi Peter Thiel, fyrsti utanaðkomandi fjárfestirinn að Facebook, boðið tveimur námsmönnum upp á sem svarar um 11 milljón króna styrk til að sinna hugmyndum sínum í stað þess að ljúka námi, svo að þær geti orðið að fullu starfi.