Silvio og Barbara Berlusconi á góðri stundu. Reuters

Barbara Berlusconi, hin íðilfagra dóttir ítalska auðjöfursins og forsætisráðherrans, kveðst á stundum ekki vera sammála föður sínum í stjórnmálunum en að hún elski hann ekkert síður fyrir það. Hún trúir hins vegar ítalskri útgáfu Vanity Fair fyrir því að hún sé þó bitur út í föður sinn.

Ástæðan er kvennafar Berlusconis sem leiddi til þess að Veronica Lario, móðir Barböru, sótti um skilnað. 

„Þessi atvik hafa gert mig bitra. Mér reynist erfitt að svara fyrir hann. Það er augljóst að ég tek ekki undir vissa hegðun en ég verð að reyna að hafa trú á föður mínum.“

Barbara segist ala þá von í brjósti sínu að hneykslismálin muni ekki varpa svo löngum skugga að afrek forsætisráðherrans falli í gleymsku. Hann hafi þjónað Ítalíu með ástríðu og stolti.

Aðspurð hvort líta megi á Berlusconi sem poppstjörnu tekur Barbara undir það, enda tali hann mál alþýðunnar og þekki leiðina að hjörtum hennar.

Ástarmál forsætisráðherrans, sem stóð af sér vantrauststillögu fyrr í mánuðinum, vinda stöðugt upp á sig og hefur ung stúlka, Nadia Macri, stigið fram og fullyrt að hann hafi greitt henni sem svarar um 1,5 milljónum króna fyrir mök. Mun þjónustan hafa verið veitt tvisvar. Berlusconi vísar þessu alfarið á bug.

Silvio Berlusconi á ekki alltaf sjö dagana sæla í embætti forsætisráðherra. Reuters