Nick Clegg og David Cameron. Reuters

Djúpstætt vantraust ríkir innan Frjálslyndra demókrata í Bretlandi í garð Íhaldsflokksins, samstarfsflokksins í bresku ríkisstjórninni. Breska blaðið Daily Telegraph birti í dag ummæli nokkurra ráðherra Frjálslyndra demókrata um Íhaldsflokkinn, sem ráðherrarnir létu falla í samtökum við blaðamenn, sem þóttust vera áhyggjufullir kjósendur flokksins.

Blaðið hefur m.a. eftir Paul Burstow, aðstoðarheilbrigðisráðherra að varhugavert sé að treysta David Cameron, forsætisráðherra og leiðtoga Íhaldsflokksins. Þá sagðist  Andrew Stunell, aðstoðarráðherra í sveitarstjórnamálum, að hann vissi ekki hvar Cameron væri á „einlægniskvarðanum." 

Blaðamenn Daily Telegraph fóru í viðtalstíma hjá ráðherrum Frjálslyndra demókrata og þóttust vera kjósendur flokksins í kjördæmum þeirra. Í gær birti blaðið ummæli Vince Cable, viðskiptaráðherra Bretlands, sem sagði við „kjósendurna" að hann hefði lýst yfir stríði á hendur Rupert Murdoch vegna tilrauna Murdochs til að yfirtaka sjónvarpsstöðina BSkyB.  

Bresk samkeppnisyfirvöld fjalla nú um yfirtökutilboð Murdochs. Cameron ákvað í gær að svipta Cable völdum yfir fjölmiðlum, fjarskiptum og sjónvarpsstöðum og bannaði honum að koma nálægt málum Murdochs.

Í sama samtalinu hótaði Cable einnig, að fella ríkisstjórnina ef Frjálslyndir demókratar gæfu of mikið eftir í samstarfinu við Íhaldsflokkinn.  Vitað er að Cable hefur verið mjög óánægður með stjórnarsamstarfið og hann telur að Frjálslyndir demókratar hafi orðið að gera of miklar málamiðlanir. 

Nick Clegg, leiðtogi Frjálslyndra demókrata og aðstoðarforsætisráðherra, hefur reynt að gera lítið úr málinu og sagði í gær, að ummæli Cables og annarra ráðherra væru eðlilegur hluti stjórnmálanna og ekki ætti að koma á óvart að skiptar skoðanir væru innan flokkanna um stjórnarsamstarfið. 

Cameron tók í sama streng og sagði við blaðamenn að þeir yrðu að horfa á heildarmyndina og þann árangur, sem ríkisstjórnin hefði náð.

Ed Miliband, leiðtogi Verkamannaflokksins, sem er í stjórnarandstöðu, sagði hins vegar, að uppljóstranir Telegraph sýndu, að samsteypustjórnin væri leiktjöldin ein.