Ricardo Martinelli, forseti Panama, segir málið á misskilningi byggt. Reuters

New York Times greinir frá skjölum sem hafa verið birt á vef Wikileaks sem fjalla um aukin umsvif bandarísku fíkniefnaeftirlitsins (DEA). Segir að erlend stjórnvöld hafi beitt stofnuna þrýstingi til að fá hana til að hlera símtöl hjá pólitískum andstæðingum.

Panama og Paragvæ eru á meðal þeirra ríkja sem eru nefnd í skjölunum.

Ríkisstjórn Panama segir hins vegar að sendifulltrúi Bandaríkjanna hafi misskilið beiðni Ricardo Martinelli, forseta landsins, um símahleranir. Þetta kemur fram á vef BBC.

Í gögnum frá ágúst 2009 er haft eftir forsetanum að hann hafi sent sendiherra Bandaríkjanna í Panama dulkóðuð Blackberry-skilaboð sem hafi verið eftirfarandi: „Ég þarfnast aðstoðar við símahleranir.“

Haft er eftir þáverandi sendiherra Bandaríkjanna í Panama, Barböru Stephenson, að: „Hann vísaði í ýmsa hópa og einstaklinga sem hann telur að eigi að hlera, og hann gerði engan greinarmun á raunverulegri vá og pólitískum óvinum.“

Stjórnvöld í Panama hafa sent frá sér yfirlýsingu vegna málsins þar sem segir að ríkisstjórnin harmi það að bandarísk yfirvöld skuli hafa misskilið málið. Aðeins hafi verið óskað eftir aðstoð í baráttunni við skipulagða glæpastarfsemi og fíkniefnasölu.

„Við báðum aldrei um aðstoð til að hlera síma hjá stjórnmálamönnum. Að málið skuli hafi verið túlkað með þeim hætti á ekki við nein rök að styðjast,“ segir í yfirlýsingu frá stjórnvöldum í Panama.

Umfjöllun New York Times.