Liang Guanglie.

Ört vaxandi hagkerfi Kína leggur grunninn að nútímavæðingu og eflingu kínverska hersins. Kínverjar vilja auka herstyrk sinn án utanaðkomandi aðstoðar, að sögn varnarmálaráðherra Kína.

„Á næstu fimm árum mun herinn okkar undirbúa sig betur fyrir hernaðarátök á öllum mögulegum sviðum,” segir Liang Guanglie varnarmálaráðherra í viðtölum við kínverska ríkismiðla í dag.

„Við lifum kannski á friðartímum, en við megum aldrei gleyma stríði, aldrei að losa okkur við alla hestana og henda byssunum og byssustingjunum.” Liang segir að her Kína muni halda áfram að útfæra getu sína til þess að heyja hátæknivætt stríð, auk þess sem hefðbundinn herstyrkur verði aukinn.

Liang mun eftir tíu daga taka á móti Robert Gates, varnarmálaráðherra Bandaríkjanna, sem kemur í opinbera heimsókn til Kína. Hann segir að herinn, sem nú telur 2,3 milljónir manna, muni ekki horfa til útlanda eftir bættum tækjabúnaði.

„Við munum standa á eigin fótum við að leysa það mál og þróa okkar búnað. Nútímavæðing kínverska hersins getur ekki oltið á öðrum og ekki verður hægt að kaupa hana að utan,” segir Liang.

Aukin hernaðarútgjöld Kínverja eru farin að valda öðrum Asíuríkjum áhyggjum. Í þessum ánuði sögðu japönsk stjórnvöld að vígvæðingin væri áhyggjuefni og að Kínverjar væru nú með mun meiri hernaðarlega viðveru á Austur- og Suður-Kínahafi.

Bandarískir sérfræðingar sjá Kína sem ógnun við alger yfirráð Bandaríkjanna á Kyrrahafinu fram til þessa. Kínverjar halda því hins vegar fram að engin ógn stafi af hernum þeirra. Liang segir að verið sé að efla sjóher, flugher og eldflaugavarnir, en á sama tíma sé mjög verið að draga úr hjá landhernum.

Gates verður í Peking níunda til tólfta janúar. Nú er ár síðan Kínverjar slitu samskiptum á milli hers síns og hers Bandaríkjamanna, eftir að þeir síðarnefndu gerðu milljarða dollara samning við Taívan um sölu á hergögnum.

Í millitíðinni tóku Kína og Bandaríkin aftur upp takmörkuð samskipti um tæknileg málefni á milli herja ríkjanna. Það var Liang sem bauð Gates að koma til Peking.