Hundruð farþega þurftu að bíða í flugvélum í allt að 10 klukkustundir á Kennedy flugvelli í New York í vikunni en þar ríkti algert öngþveiti eftir að völlurinn hafði verið lokaður í á annan sólarhring vegna snjókomu.

Allir stóru flugvellirnir þrír á New York svæðinu lokuðust vegna óveðurs sem gekk yfir austurströnd Bandaríkjanna um helgina.  Vellirnir opnuðust aftur á mánudagskvöld og hófu flugfélög þá á ný að fljúga til New York. Eftir að flugvélar lentu tók hins vegar oft við löng bið eftir að fá úthlutað stæðum. 

Farþegar, sem fóru með flugvél frá ástralska flugfélaginu Cathay Pacific í voru á löngu ferðalagi. Flugvélinni var fyrst beint til Toronto í Kanada vegna þess að ekki var hægt að lenda á Kennedy flugvelli. Þar var beðið í 9 stundir áður en haldið var til New York. Þar beið flugvélin síðan í 10 tíma á flugvellinum eftir stæði við flugstöðvarbygginguna. Haft var eftir farþegum, að þeir hefðu aðeins fengið núðlur að borða á meðan. 

Að sögn talsmanna stofnunarinnar, sem rekur Kennedy flugvöll sendu flugfélög vélar til New York án þess að panta stæði við flugstöðvarbygginguna áður. Talsmaður Cathay Pacific sagði, að flugvélarnar hefðu lagt af stað þar sem talið er að þeim yrði sinnt eftir lendingu. 

Samkvæmt fréttum frá New York þurfti flugvél frá Iceland Express einnig að bíða lengi eftir að komast í stæði en félagið flýgur milli Keflavíkur og New Jersey.