Rússar sæta harðri alþjóðlegri gagnrýni fyrir fangelsisdóm, sem kveðinn var upp yfir Mikhaíl Khodorkovskí í gær. Samkvæmt dómnum mun Khodorkovskí, sem eitt sinn var ríkasti maður Rússlands, sitja í fangelsi til ársins 2017 fyrir fjársvik og peningaþvætti.

Khodorkovskí hefur setið í fangelsi frá árinu 2003 vegna átta ára fangelsisdóms sem hann  hlaut fyrir skattsvik. Áður en hann var handtekinn hafði hann tekið þátt í stjórnmálaumræðu og gagnrýnt Vladímír Pútín, þáverandi forseta Rússlands og núverandi forsætisráðherra. Pútín lýsti því nýlega yfir í sjónvarpsviðtali, að „þjófurinn yrði að vera í fangelsi." 

Bæði utanríkisráðuneyti Bandaríkjanna og Evrópusambandið hafa gagnrýnt dóminn yfir Khodorkovskí og Platon Lebedev, sem fékk jafnþungan dóm. Vestræn ríki og mannréttindasamtök hafa fylgst grannt með málinu en litið hefur verið á það sem prófstein á sjálfstæði rússneskra dómstóla og nútímavæðingar þjóðfélagsins.

Nú segja sumir, að dómurinn staðfesti þær grunsemdir að lítið hafi breyst í Rússlandi.  „Rússneska ríkisstjórnin getur einfaldlega ekki þróað nútímalegt hagkerfi án þess að þróa jafnhliða óháð dómskerfi," sagði Mark Toner, talsmaður bandaríska utanríkisráðuneytisins.

Angela Merkel, kanslari Þýskalands, sagðist hafa orðið fyrir vonbrigðum með dóminn. og Sabine Leutheusser-Schnarrenberger, dómsmálaráðherra Þýskalands, sagði dóminn hafa staðfest það sem hún óttaðist mest varðandi Rússland. 

Catherine Ashton, utanríkismálastjóri Evrópusambandsins, sagði að ásakanir um að ekki væri allt með felldu í rússneska dómskerfinu valdi vonbrigðum og áhyggjum. 

Mál Khodorkovskís vakti hins vegar litla athygli í Rússlandi í gær og fjölmiðlar þar fjölluðu lítið um dóminn.