Tjaldbúðir á Haítí. Reuters

Skýrsla mannréttindasamtakanna Amnesty International hefur leitt í ljós að mikið er um nauðganir í flóttamannabúðum í Haítí. Eitt ár er liðið síðan harður jarðskjálfti reið yfir landið. Talið er að yfir ein milljón manna hafi misst heimili sín og enn búa margir í flóttamannabúðum.

Fjöldi frásagna kvenna birtast í skýrslunni, t.a.m. saga Guerline sem missti eiginmann sinn þegar heimili fjölskyldunnar hrundi í skjálftanum. Tveimur mánuðum síðar horfði hún upp á fjóra menn nauðga 13 ára dóttur hennar í flóttamannabúðum í Port-au-Prince. „Þeir sögðu við mig að ef ég segði frá myndu þeir drepa mig. Þeir sögðu að ef ég færi til lögreglunnar þá myndu þeir skjóta mig til bana. Ég er hrædd, ég get ekki búið á neinum öruggum stað þannig að ég varð að þegja,“ sagði Guerline en það er ekki hennar rétta nafn. Öllum konunum, sem segja sögu sína í skýrslunni, hefur verið gefið annað nafn til að koma í veg fyrir að nauðgararnir hefni sín á þeim fyrir að segja frá.

Sama kvöld og dóttur Guerline var nauðgað var henni sjálfri nauðgað. Hettuklæddir menn réðust að henni í búðunum.

Að sögn Amnesty International er lítið gert til að hjálpa Guerline og öðrum fórnarlömbum nauðgunar og kynferðislegs ofbeldis á Haítí. Nauðganir voru algengar á Haítí fyrir skjálftann en eftir að hann reið yfir hafa þær stóraukist.

Yfir 230 þúsund manns létust og 300 þúsund særðust í skjálftanum í janúar 2010. Mikil eyðilegging og mörg dauðsföll höfðu það í för með sér að margar konur og ungar stúlkur misstu fjölskyldur sínar og þau tengslanet sem hefðu getað varið þær frá ógnunum sem nú steðja að þeim. Lífsskilyrðin í flóttamannabúðunum séu slæm og ótrygg sem geri ástandið enn verra fyrir konurnar.

Talið er að rúm 1 milljón Haítí-búa búi í um 1.200 flóttamannabúðum víðsvegar um landið. Meirihlutinn er konur. „Konur og stúlkur í búðunum búa við ekkert öryggi,“ segir Gerardo Ducos, leiðtogi Amnesty International á Haítí. „Vopnuð gengi ráðast á konur þegar þeim sýnist, nokkuð öruggir um að þeir verði aldrei látnir svara fyrir það.“ Yfirleitt eru það vopnaðir menn eða hópur manna sem ráðast á konurnar þegar tekur að myrkva enda búðirnar flestar illa lýstar. Fæstar nauðganirnar eru tilkynntar til lögreglunnar.