Shrien Dewani, liggur undir grun. Reuters

Anni Dewani sendi vinkonu sinni smáskeyti um að nýjasta áhugamál hennar væri að gráta, aðeins sex dögum áður en Dewani var myrt í fátækrahverfi Höfðaborgar í Suður Afríku í nóvember sl. Þetta kemur fram í breska dagblaðinu The Sun í dag.

Vinkonan, sem er búsett í Mumbai í Indlandi, sendi Anni smáskeyti þar sem hún spurði hvernig hún hefði það. Anni svaraði: „Allt í lagi, nýjasta áhugamálið mitt er að gráta.“ og bætti síðan við: „Ég vona að það verði betra einhvern daginn.“

Mál hinnar sænsku Dewani hefur vakið mikla athygli í fjölmiðlum, en hún var myrt í brúðkaupsferð hennar og eiginmanns hennar, Shrien Dewani. Shrien hefur legið undir grun síðan og segja yfirvöld í Suður Afríku að hann hafi greitt morðingjunum fyrir ódæðisverkið. Hann heldur því hins vegar staðfastlega fram að verið sé að reyna koma sök á hann í því skyni að bjarga andliti ferðamannaiðnaðarins í landinu. Fjórir menn hafa verið handteknir í tengslum við málið.

Dewani, 30 ára og Anni, 28 ára, höfðu verið gift í tvær vikur er hún var myrt. Þau voru á leiðinni heim á hótel sitt í Höfðaborg eftir að hafa verið úti að borða þegar þau ákváðu að taka krók á heimferðinni um Gugulethu, einu helsta fátækrahverfi borgarinnar. Einungis þremur mínútum eftir að þau óku af þjóðveginum stöðvuðu tveir vopnaðir menn leigubílinn. Að sögn Dewani var honum hent út úr bifreiðinni eftir að þjófarnir voru búnir að ræna öllum verðmætum sem þau voru með í fórum sínum. Þeir óku áfram með Anni og myrtu hana að lokum.

Shrien segir að hjónin hafi verið alsæl eftir brúðkaupið. Nýjar upplýsingar kunna þó að benda til annars, en auk skeytisins hefur komið fram að Anni grýtti trúlofunarhring sínum í Shrien rúmri viku fyrir brúðkaupið. Sú frásögn kemur frá sömu vinkonu og lét breska dagblaðið vita af smáskeytunum.