Sarah Palin, fyrrverandi ríkisstjóri í Alaska, vísar því á bug að kenna megi pólitískri orðræðu um morðin í Tucson í Arizona. Palin hefur verið gagnrýnd fyrir orðanotkun og fyrir að vera með kort á heimasíðu sinni þar sem skotskífa beinist að nokkrum þingmönnum demókrata.

Palin birti í dag myndband á heimasíðu sinni þar sem hún svarar þessum ásökunum. Palin sagði að ásakanirnar séu ábyrgðarlausar og það sé fráleitt að kenna pólitískum umræðum um harmleikinn í Arizona.

Talið er líklegt að Palin muni sækjast eftir því að verða forsetaefni Repúblikanaflokksins í forsetakosningunum árið 2012.

Eftir morðin í Arizona hafa margir rifjað upp orð sem Palin lét falla eftir að heilbrigðisfrumvarp Obama forseta var samþykkt, en þá sagði hún „að nú væri ekki tími til að hörfa heldur að hlaða að nýju.“

„Eins og svo margir aðrir hef ég notað síðustu daga til að reyna að átta mig á því sem hefur gerst og biðja um leiðbeiningu,“ sagði Palin. „Eftir þennan hræðilega atburð, hlustaði ég undrandi og síðan með áhyggjum og sorg á yfirlýsingar fólks sem hafa reynt að skella sökinni af þessum hræðilega atburði yfir á aðra.“