Flóttamannabúðir í Port-au-Prince á Haítí. Reuters

Ótti og örvinglan greip um sig meðal íbúa flóttamannabúða í  Port-au-Prince, höfuðborg Haítí, þegar embættismenn hófu lokun búðanna í gær.

Í tjaldbúðunum hafa fórnarlömb jarðskjálftans þann 12. janúar fyrir rúmu ári búið síðan þá og heimilislausar fjölskyldur sátu á jörðinni með fátæklegar eigur sínar í fanginu, óvissar um framhaldið.

Íbúar búðanna fengu að vita með nokkurra klukkustunda fyrirvara að til stæði að loka þeim og þeim var heitið jafnvirði 500 Bandaríkjadala í sárabætur.

Embættismenn borgarinnar komu ekki með peningana fyrr en seint í gærkvöldi og mikil örvænting hafði þá gripið um sig meðal fólksins.

Jelene Dorest, átta barna móðir og einn íbúa tjaldbúðanna sagði í samtali við AFP fréttastofuna að henni hefði verið sagt í gærmorgun að taka niður tjaldið sitt. Hún sagðist ekki vita hver næsti næturstaður yrði.

Ástæða þessara aðgerða virðist vera að fækka þeim sem búa við hættulegar og ófullnægjandi aðstæður í yfirfullum tjaldbúðum.

Samkvæmt tölum frá Sameinuðu Þjóðunum búa yfir 800 þúsund manns í tjaldbúðum eftir jarðskjálftann á Haítí. Fyrir hálfu ári bjuggu ein og hálf milljón manna í búðum.

Búðirnar voru hugsaðar sem neyðarúrræði fyrir þá sem misstu heimili sín í jarðskjálftanum, en ástandið þar hefur verið skelfilegt; þar breiðast út sjúkdómar á borð við kóleru, glæpagengi hrella íbúana og nauðganir eru afar tíðar.