Carlina White.

„Kona, sem ól upp barn, sem rænt var fyrir tveimur áratugum, er nú í haldi bandarísku alríkislögreglunnar vegna skilorðsrofs. Konan gaf sig fram við lögreglu í Connecticut í morgun.

Mál Carlinu White hefur vakið heimsathygli að undanförnu. Henni var rænt af sjúkrahúsi í New York fyrir 23 árum en hún var þá aðeins 19 daga gömul. Hún ólst síðan upp í Connecticut undir nafninu Nejdra Nance hjá konu, að nafni Ann Pettway.

Komið hefur fram, að Pettway var háð eiturlyfjum og fór illa með stúlkuna. Þegar Carlina varð þunguð á unglingsaldri flutti hún að heiman.

Carlina hafði lengi haft á tilfinningunni að fjölskyldan sem ól hana upp væri ekki öll þar sem hún var séð. Þegar Pettway gat ekki fundið fæðingarvottorðið hennar ákvað Carlina að grennslast fyrir um málið. Hún notaði veraldarvefinn til þessa og rakst á sögu af lítilli stúlku, sem rænt var af spítala árið sem hún fæddist. Hún komst í samband við lögregluyfirvöld sem hjálpuðu henni við að komast í samband við sína réttu fjölskyldu.

Hinir réttu foreldrar Carlinu heita Joy White og Carl Tyson. Þau fóru með hana nýfædda á sjúkrahús í Harlem þegar hún fékk háan hita. Á meðan þau fóru heim að hvílast var barninu rænt. Telur lögregla að þar hafi verið að verki kona sem var klædd eins og hjúkrunarfræðingur. Nú hefur verið staðfest með DNA-rannsókn að Carlina er dóttir White og Tyson.

Ann Pettway fluttist til Norður-Karólínu fyrir nokkrum árum ásamt syni sínum. Þar hlaut hún skilorðsbundinn dóm fyrir tilraun til fjársvika og eitt af skilyrðunum var að hún færi ekki út fyrir Norður-Karólínu á skilorðstímanum. Það skilyrði rauf hún með því að fara til Connecticut.

Ekki er hægt að ákæra Pettway fyrir barnsrán í New York ríki vegna þess að brotið er nú fyrnt samkvæmt lögum þar. Alríkislögreglan FBI skoðar nú hvort hún geti tekið málið yfir en mál horfinna barna fyrnast aldrei hjá FBI.

Carlina White segist alsæl með að hafa fundið hina réttu fjölskyldu sína aftur.

„Ég er svo hamingjusöm," sagði hún við blaðið New York Post í síðustu viku. „En þetta er skrítin tilfinning vegna þess að allt er svo nýtt. Það er eins og ég hafi fæðst aftur."

Týnd stúlka finnst eftir 23 ár