Gyðingabyggðir í Jerúsalem. Reuters

Hátt settir palestínskir embættismenn hafa dregið í efa það sem fram kemur í skjölum sem var lekið var til arabísku sjónvarpsstöðvarinnar al-Jazeera. Í þeim kemur fram að samningamenn Palestínumanna hafi verið reiðubúnir til að falla frá tilkalli til stórs hluta af A-Jerúsalem, sem er hluti af herteknu svæðunum.

Þá segir að Ísraelar hafi hafnað þessu tilboði Palestínumanna, sem var lagt fram árið 2008.

Saeb Erekat, aðalsamningamaður Palestínumaður, segir að þessar fréttir séu „haugalygi“.

Þá hefur Mahmoud Abbas, leiðtogi Palestínumanna, dregið sannleiksgildi skjalanna í efa. „Ég hef ekki hugmynd um hvernig al-Jazeera fékk þessar leynilegu upplýsingar,“ hafa fjölmiðlar í Egyptalandi eftir Abbas, sem er staddur í Kaíró þar sem hann mun funda með forseta Egyptalands. 

Al-Jazeera segist hafa undir höndum 16.076 skjöl, m.a. fundargerðir, tölvupósta og samskipti á milli leiðtoga Palestínu, Ísraels og Bandaríkjanna. Skjölin ná frá árinu 2000 til ársins 2010.

Palestínumenn eru sagðir hafa lagt til að alþjóðleg nefnd myndi hafa yfirumsjón með heilögustu svæðin múslíma í Jerúsalem. Þá fjöldi flóttamanna, sem yrði aftur hleypt til borgarinnar, takmarkaður við 100.000 á 10 ára tímabili.

Talið er að Palestínumenn hafi lekið skjölunum til al-Jazeera.

Erekat segir að leiðtogar Palestínu hafi ekkert að fela. „Við höfum ekki gengið á bak orða okkar,“ sagði hann í samtali við al-Jazeera.