Þinghús Bandaríkjanna í Washington. Reuters

Bandaríkin stefna hraðbyri í gjaldþrot fyrir árið 2020, ef ekkert verður að gert, að mati danska hagfræðingsins Jörgen Möller Örström. Segir hann að skuldasöfnun Bandaríkjanna sé svo geigvænleg að nú styttist í að skuldirnar verði óviðráðanlegar.

Örström þessi er fyrrverandi sendiherra Danmerkur og starfar nú sem fræðimaður við ISEAS, Institute of Southeast Asian Studies í Singapore. Hann hefur gefið út fjölda fræðirita um hagfræði, en þetta viðhorf sitt kynnti hann á fyrirlestri í tónlistarhúsinu í Kaupmannahöfn, þar sem hann talaði fyrir framan alla helstu stjórnmálaleiðtoga Danmerkur.

Sagði hann að hugsanlegt gjaldþrot Bandaríkjanna myndi hafa víðtækar afleiðingar, líka fyrir danskt efnahagslíf, og höfðaði þannig til áheyrenda sinna þar. Sagði hann að Bandaríkin yrðu að herða sultarólina verulega og skera niður um tvö til þrjú prósent af vergri landsframleiðslu, bara til að koma á stöðugleika í skuldum.

Það er talsvert meiri niðurskurður en talinn er nauðsynlegur í sumum verst stöddu evrulöndunum, eins og Grikklandi, sem þó er talið standa mjög illa. Hins vegar sagði Örström Bandarísk stjórnvöld ekki átta sig á þessu og forðast skattahækkanir á sama tíma og útgjöld væru aukin.

Á sama tíma sagði hann að þjóðin væri að eldast og því fyrirséð að útgjöld til heilbrigðis- og velferðarmála eigi bara eftir að aukast, ætli menn að viðhalda sömu viðmiðum í þeim efnum eins og nú. Hann spáði því að vaxtakostnaður Bandaríkjanna myndi vaxa úr átta til tíu prósentum af fjárlögum upp í um 20% árið 2020. Óhugsandi væri að sjá hvernig það gæti gengið upp, eða hvaðan allir þeir peningar ættu að koma. Bandaríkin stæðu frammi fyrir skelfilegu vandamáli.

Greint er frá ræðu Örströms á danska fréttavefnum business.dk og má lesa frétt vefjarins um ræðuna í heild sinni þar, á dönsku.

Sjá hér.