Mótmæli hafa staðið yfir í Egyptalandi í allan dag. Reuters

Að minnsta kosti 18 hafa látist í mótmælunum í Egyptalandi í dag. Þetta hefur BBC eftir læknum í Egyptalandi. Talið er að yfir 1000 manns hafi særst í átökum í Kaíró og Suez í dag.

Forseti egypska þingsins sagði í kvöld að Egyptaland væri í „öruggum höndum“ Hosni Múbarak, forseta landsins.  Hann sagði að þing landsins myndi koma saman til fundar á sunnudag, en mikill meiri þingmanna styðja Múbarak.

Þrátt fyrir útgöngubann hafa tugþúsunda Egypta haldið áfram að mótmæla á götum úti og m.a. kveikt í höfuðstöðvum stjórnarflokks Hosni Múbaraks forseta.

Mótmælendur hafa setið um lykilbyggingar í Egyptalandi, m.a. utanríkisráðuneytið og sjónvarpshúsið. Mótmælendur kveiktu í höfuðstöðvum stjórnarflokksins í Kaíró og segir fréttamaður BBC á staðnum að hvorki lögregla né herinn hafi verið á staðnum til að reyna að halda aftur af mótmælendum.

Herinn hefur verið á götum borga í Egyptalandi í dag, en yfirmenn hersins hafa ekki gefið út neinar skýrar yfirlýsingar um að herinn styðji Múbarak forseta eða mótmælendur. Margir mótmælendur hafa tekið fagnandi á móti hermönnum.

Ekkert hefur heyrst frá Hosni Múbarak forseta Egyptalands, sem haldið hefur um stjórnartauma í landinu í 31 ár. Forseti þingsins lýsti því hins vegar yfir í kvöld að von væri á yfirlýsingu frá stjórnvöldum.

BBC segir að hermenn hafi fengið fyrirskipun um að verja fornmuni sem varðveittir eru í söfnum í Egyptalandi. Stórt safn er við hliðina á höfuðstöðvum stjórnarflokksins í Kaíró sem hafa brunnið í kvöld.

Talmaður Barack Obama forseta Bandaríkjanna sagði á blaðamannafundi í kvöld að Obama hefði ekki rætt við Múbarak í dag. Bandaríkjamenn hafa útvegað egypska hernum gríðarlegar mikið af vopnum í gegnum árin og hermenn sem nú reyna að halda aftur af mótmælendum eru því vopnaðir bandarískum vopnum.