Borgarstjórinn í New York hefur staðfest hertar reglur um reykingar í borginni, en þær fela m.a. í sér að reykingar verða bannaðar í almenningsgörðum, með strandlengjunni og á Times-torgi.

Reglurnar taka gildi eftir þrjá mánuði, en þær verða einhverjar þær ströngustu sem í heiminum. Bannað verður að reykja í um 1.700 görðum í borginni og með strandlengjunni sem er um 23 km löng.

„Í sumar geta New York-búar gengið um garða og með fram ströndinni og  setið á bekkjum án þess að þurfa að anda að sér sígarettureyk,“ sagði  Michael Bloomberg borgarstjóri. Reglurnar voru samþykktar í borgarstjórn með 36 atkvæðum gegn 12.

Umsjónarmenn útivistarsvæða fá heimild til að sekt fólk sem brýtur reglurnar. Sektin verður innan við 100 dollarar.

Einn fulltrúi í borgarstjórn sagði þegar hann var spurður hvernig myndi ganga að framfylgja þessum nýju reglum, að það færi talsvert eftir því hvað íbúar borgarinnar yrðu duglegir að minna þá sem reyktu á bannið.

Bann við reykingum á skemmtistöðum og veitingahúsum hefur verið í gildi í New York í um áratug. Í Los Angeles er bannað að reykja í almenningsgörðum og í Chicago er bannað að reykja við leiksvæði barna.