Mohamed ElBaradei, sem fer fyrir laustengdum samtökum stjórnarandstöðuflokka, segist vera reiðubúinn að bjóða sig fram til forseta Egyptalands fari almenningur fram á það. Undanfarna daga hafa þúsundir mótmælenda krafist þess að Mubarak Egyptalandsforseti segi af sér.

„Ég er reiðubúinn að bjóða mig fram til forseta óski almeningur eftir því,“ sagði ElBaradei, sem er fyrrverandi framkvæmdastjóri Alþjóðakjarnorkumálastofnunarinnar, í samtali við Al-Jazeera.

„Nú hef ég sett það í forgang að koma á lýðræði [í Egyptalandi],“ sagði hann ennfremur.

ElBaradei sneri aftur til Egyptalands fyrir um ári þegar hann lét af starfi sínu hjá stofnuninni. Hann nýtur mikil stuðnings í heimalandinu meðal lýðræðissinna, en ElBaradei hefur kallað eftir lýðræðisumbótum í landinu.

Hann segir að hann muni aðeins bjóða sig fram til forseta sem frjáls og óháður frambjóðandi verði kosningarnar bæði frjálsar og lýðræðislegar.

Skv. núgildandi stjórnarskrá Egyptalands er nánast útilokað að ElBaradei geti boðið sig, því óháðir frambjóðendur verða að fá stuðning frá þingmönnum og sveitarstjórnarmönnum, sem eru flestir ef ekki allir hliðhollir Mubarark forseta.