Egyptar mótmæla nú fjórtánda daginn í röð. Reuters

Egypskir mótmælendur segja að þær stjórnarumbætur sem hafa verið gerðar í Egyptalandi á undanförnum dögum séu marklausar. Mubarak verði að víkja. 

Egyptar mótmæla nú fjórtánda daginn í röð og á Tahrir torgi í miðborg Kaíró er fjöldi mótmælenda.

Barack Obama, Bandaríkjaforseti, sagði í viðtali við Fox sjónvarpsstöðina í gær að „Egyptaland hefði breyst til framtíðar“ og sagði að nýrrar ríkisstjórnar væri þörf. Hann sagði þó ekki að Mubarak þyrfti að láta af völdum nú þegar. 

Omar Suleiman, varaforseti Egyptalands, hélt fund með mótmælendum í gær, þeirra á meðal voru leiðtogar Íslamska bræðralagsins.

Talsmaður ríkisstjórnarinnar, Magdi Radi, sagði að deiluaðilar hefðu ákveðið að skipa nefnd dómara og stjórnmálamanna, sem leggja ætti til breytingar á stjórnarskránni og stjórnarskrárviðbætur. Þeirri vinnu á að vera lokið í byrjun marsmánaðar.

Einnig var ákveðið að setja á stofn þjónustu, sem tekur við kvörtunum pólitískra fanga, að minnka hömlur á fjölmiðla og að hafna afskiptum erlendra ríkja af deilunni.

Athygli hefur vakið að einn helsti forystumanna mótmælanna, friðarverðlaunahafinn  Mohamed ElBaradei, var ekki boðaður á þennan fund.

Hillary Clinton, utanríkisráðherra Bandaríkjanna, segir að brotthvarf Mubaraks sé undir egypsku þjóðinni komið, en leggur áherslu á að glundroði gæti skapast, fari hann frá völdum. „Mér skilst, að ef forseti segir af sér, þá komi forseti þingsins í hans stað og síðan verði forsetakosningar haldnar innan 60 daga,“ sagði Clinton.