Donald Rumsfeld er fyrrverandi varnarmálaráðherra Bandaríkjanna. Reuters

Donald Rumsfeld, fyrrverandi varnarmálaráðherra Bandaríkjanna, er óspar á gagnrýni á fyrrum samstarfsmenn sína í nýútkominni ævisögu. Rumsfeld viðurkennir jafnframt að það hefði verið betra fyrir bandarísku þjóðina ef hann hefði sagt af sér eftir eftir Abu Ghraib hneykslið, sem kom upp 2004.

Myndir af misþyrmingum bandarískra hermanna á íröskum föngum í Abu Ghraib-fangelsinu í Bagdad hneyksluðu heimsbyggðina eftir að þær voru birtar í fjölmiðlum víða um heim.

Í bókinni Known and Unknown ver Rumsfeld þær ákvarðanir sem hann tók í tengslum við stríðið í Írak, þá segir hann frá embættismannaferli sínum. Þar greinir hann m.a. frá því þegar hann starfaði með Richard Nixon, fyrrverandi Bandaríkjaforseta, og öðrum forsetum úr röðum repúblikana, síðast sem George W. Bush.

Rumsfeld segir að sér hafi ekki tekist að sannfæra Bush um að samþykkja uppsögn sína eftir Abu Ghraib hneykslið. Það hafi verið sín stærstu mistök.

„Álagið á þjóðina var gríðarlegt. Það að halda að fólk sem var í okkar vörslu hafi verið meðhöndlað á jafn ógeðfelldan, sjúkan og skelfilegan hátt - algjörlega óviðunandi hátt,“ sagði Rumsfeld í sjónvarpsviðtali við Diane Sawyer hjá ABC.

„Ég sagði við forsetann að ég væri þeirrar skoðunar að ég ætti að segja af mér. Og ég held, að öllum líkindum, að staða hersins, Pentagons og þjóðarinn hefði verið betri, hefði ég gert það,“ sagði Rumsfeld í sínu fyrsta sjónvarpsviðtali í rúm fjögur ár. En hann lét af embætti í desember 2006 eftir langan ferill hjá varnarmálaráðuneytinu.

Bush lét þau ummæli falla að það hefðu verið ein stærstu mistökin í stríðsrekstrinum í Írak að fækka stórlega í bandaríska herliðinu skömmu eftir innrásina í Írak árið 2003. Rumsfeld segir að hægt sé að færa rök fyrri því en hann er þó tregur til að fallast á það mat.