Tuttugu manns létu lífið þegar táningur framdi sjálfsvígssprengjuárás í Pakistan í nótt. Skotmark táningsins voru nýliðar í hernum sem voru saman komnir á hersýningu. Talibanar hafa sagst bera ábyrgð á árásinni, sem þeir segja hefnd fyrir loftárásir bandaríska hersins og árásir pakistanska hersins.

Táningurinn var klæddur í skólabúning er hann gekk upp að hersýningunni. Sýningin var haldin á afgirtu og vernduðu svæði í bænum Mardan, en þar er einnig skóli. Táningurinn sprengdi sig í loft upp og drap um leið hermennina sem voru nærri.

Þetta er mesta sjálfsvígssprengjuárás í Pakistan síðan kona drap fjörutíu og þrjá með sprengju sem hún klæddist undir búrku sinni á jóladag 2010. Fórnarlömbin voru viðstödd matarúthlutun Sameinuðu þjóðanna.

Í sama mund og Talibanar játuðu að bera ábyrgð á árásinni hótuðu þeir að stærri árásir væru á næsta leyti.

„Nítján hermenn létust og tuttugu og sex aðrir slösuðust,“ sagði Abdulla Khan, yfirlögregluþjónn í Mardan.

Árásir af völdum Talibana og Al-Qaeda-tengdum hópum eru algengar í Pakistan. Um fjögur þúsund manns hafa látið lífið vegna slíkra árása. Þær hafa verið gerðar síðan hermenn báru múslima úr mosku í Islamabad árið 2007.

Flestar árásirnar hafa átt sér stað á afmörkuðu svæði í norðvestur hluta landsins. Bandarísk yfirvöld segja að höfuðstöðvar Al-Qaeda séu á svæðinu, en það liggur við landamæri Afganistans.