Palestínumenn hafa blendna afstöðu til ákvörðunar Mahmoud Abbas forseta um að boða til kosninga í september næstkomandi. Palestínumenn á Vesturbakkanum og Gaza voru ekki á einu máli í viðbrögðum við því að hafa kosningar eftir átta mánuði.

Abbas boðaði í gær að kosið verði til þings og einnig verði forsetakjör í september næstkomandi. Hamas hafnaði því strax og undirstrikaði með því klofning í hópi Palestínumanna.

Khaled Heisha, íbúi í Hebron, fagnaði tilkynningunni og sagði að gott yrði að fá nýja kynslóð leiðtoga. „Það að gefa unga fólkinu tækifæri til að stjórna er jákvætt skref vegna þess að stjórnmálalega og efnahagslega ástandið er slæmt. Við þurfum nýja forystu til að bæta efnahagsmálin og þoka friðarferlinu áfram.“

Margir íbúar á Gaza, þar sem Hamas er við völd, sögðu að Palestínumenn ættu að jafna ágreining sinn áður en þeir gengju til kosninga.

„Það er hvorki eðlilegt né rökrétt að tala um kosningar á meðan enn ríkir aðskilnaður á milli hópa Palestínumanna sem ráða á Gaza annars vegar og Vesturbakkanum hins vegar,“ sagði Ahmed Abu-Marsa, sem býr í Gazaborg. „Frelsissamtök Palestínu, Palestínustjórn og  stjórnvöld á Gaza ættu að ræða það að binda endi á aðskilnaðinn og sættast áður en boðað er til kosninga.“

Ólíklegt er að skyndilausn finnist á sundrungu Palestínumanna. Hamas hefur þegar lýst því yfir að samtökin taki engan þátt í kosningum og segja þau að Abbas skorti lögmæti til að boða til kosninga.