Alríkislögreglumenn standa vörð við brynvarinn bíl á eftirlitsstöð í borginni Monterrey January nú í janúar. Reuters

Að minnsta kosti 30 eru fallnir eftir mannskæð átök eiturlyfjagengja í Mexíkó síðustu daga. Átökin hafa verið í borgunum Monterry og Guadalajara og í Chihuahua héraði sem er norðarlega í landinu.

Gengin eru að berjast um yfirráð sín á milli og yfirvöld hafa sent bæði lögreglu og herinn til að freista þess að brjóta glæpastarfsemina á bak aftur. Árásirnar sem ollu manntjóninu voru síðustu merki ofbeldisins sem fylgir eiturlyfjastríðinu í Mexíkó. 

Í  Chihuahua héraði voru 11 myrtir á föstudag og laugardag í borginni Ciudad Juares, en hún státar af þeim vafasama heiðri að þar eru flest morð framin í landinu. Borgin er við landamæri Mexíkó og Bandaríkjanna og stendur gegnt borginni El Paso í Texas. 

Fimm voru drepnir í hópmorði á þjóðvegi á milli Chihuahua-borgar, sem er héraðshöfuðborgin, og Ciudad Juarez, að sögn lögreglu.  Sérsveit lögreglu og hermanna stöðvaði tvo grunsamlega bíla í borginni Monterrey og þeir sem í bílunum voru svöruðu umsvifalaust með skothríð. Sjö þeirra létu lífið.

Sex létust, þrír karlar og þrjár konur, þegar handsprengju var kastað á bar í borginni Guadalajara og síðan létu nokkrir skotmenn skothríðina dynja á fólki sem var við barinn. Þeir flúðu síðan á nokkrum bílum. Meira en 20 særðust í árásinni.

Þetta er önnur handsprengjuárásin á bar í Guadalajara á innan við mánuði. 

Meira en 34.600 manns hafa fallið í átökum og ofbeldi sem tengist eiturlyfjum í Mexíkó frá því í desember 2006. Þá ákvað ríkisstjórn Felipe Calderon forseta að beita lögreglu og her í aðgerðum til þess að brjóta eiturlyfjagengin á bak aftur.