Lögreglumenn að störfum í Rio de Janeiro. Reuters

Eitt viðamesta spillingarmál í sögu brasilísku borgarinnar Rio de Janeiro hefur orðið til þess að kona er í fyrsta skipti orðin lögreglustjóri. Fjöldi lögreglumanna var handtekinn á dögunum fyrir að hafa átt í samstarfi við eiturlyfjagengi og mafíuna.

Martha Mesquita da Rocha, sem er 51 árs gömul, var svarin í embætti á þriðjudag aðeins fimm dögum eftir viðamiklar aðgerðir gegn spillingu hjá lögregluembættinu.

„Rocha mun gegna störfum sínum með ljúfleika og hugrekki konu vegna þess að þegar kona þarf á því að halda getur hún verið hugrakkari en karlmaður,“ sagði Sérgio Cabral ríkisstjóri í Rio.

Hneykslismálið kom upp á föstudag þegar hundruð ríkislögreglumanna hófu rassíu í dögun gegn spilltum lögreglumönnum. Hingað til hafa 38 manns, þar af 30 lögreglumenn, verið handteknir í aðgerðinni sem bar nafnið „Aðgerð fallöxi“.

Á meðal þeirra sem handteknir voru er Carlos Oliveira, einn hæst setti lögreglumaður borgarinnar, og Leonardo da Silva Torres, fyrrverandi meðlimur eiturlyfjasveitar lögreglunnar í Rio, sem frægur var fyrir að vera með alvæpni og reykja vindla á meðan aðgerðum stóð.

Oliveira er sakaður um tengsl við sjálfstæðar herdeildir fylgjandi hernum og fíkniefnasmyglara en Torres á að hafa selt vopn og upplýsingar til tveggja alræmdustu eiturlyfjabaróna borgarinnar.