Andre Bamberski kemur til réttarhaldanna í dag. Reuters

Þýskur hjartalæknir kom fyrir rétt í París í dag, ákærður fyrir að myrða 14 ára gamla franska stúlku árið 1982. Faðir stúlkunnar tók réttvísina í eigin hendur og lét ræna lækninum í Þýskalandi og færa hann í böndum til lögreglu í Frakklandi.

Dieter Krombach, sem er 75 ára, studdist við hækjur þegar hann gekk inn í réttarsalinn í París. Hann leit ekki á Andre Bamberski, 73 ára, sem eyddi 29 árum í að reyna að koma lögum yfir Krombach.

Franskur dómstóll fann árið 1995 þýska lækninn sekan um manndráp þótt hann væri fjarverandi. Var Krombach dæmdur fyrir að verða Kalinku, 14 ára gamalli stjúpdóttur sinni, að bana með því að sprauta í hana óþekktu efni.

Bamberski var handtekinn árið 2009 í Mulhouse í Frakklandi, skammt frá þýsku landamærunum. Hann hafði áður hringt í lögreglu og sagt henni, að Krombach væri að finna í anddyri dómhúss borgarinnar. Þar fannst Þjóðverjinn, bundinn og með sár á höfði.

Þýsk stjórnvöld höfðu áður neitað að framselja Krombach á þeirri forsendu, að réttað hefði verið yfir honum í Þýskalandi og hann sýknaður. Bamberski var hins vegar sannfærður um að Krombach hefði gefið Kalinku deyfilyf og ætlað að nauðga henni. 

Bamberski var sjálfur ákærður fyrir mannrán og líkamsárás en hann viðurkenndi að hafa fengið menn til að ræna Krombach og flytja hann til Frakklands.  Þar er nú réttað í málinu að nýju en Mannréttindadómstóll Evrópu komst að þeirri niðurstöðu árið 2001 að Krombach hefði ekki notið fullra réttinda við fyrri réttarhöldin. 

Krombach var sviptur lækningaleyfi og dæmdur í skilorðsbundna fangelsisvist árið 1997 fyrir að beita 16 ára gamla stúlku, sem var sjúklingur hans, kynferðislegu ofbeldi eftir að haf sprautað hana með deyfilyfi á lækningastofu sinni.

Fjölmiðlamenn búa sig undir að hlýða á réttarhöldin í París. Reuters