Sagði af sér fyrir að klæðast sem kona

Ricardo Martinelli, forseti Panama, tjáði sig um málið.
Ricardo Martinelli, forseti Panama, tjáði sig um málið. Reuters

Ríkisstjórn Panama hefur samþykkt afsögn diplómata þjóðarinnar sem klæddist sem kona á karnivali á Spáni á dögunum. Diplómatinn, sem heitir Italo Afu,var fulltrúi þjóðarinnar á Kanaríeyjum og klæddist kjól í hátíðarhöldunum.

Afu baðst afsökunar á þessu og sagði að hann vildi ekki „gera neinum mein, allra síst þjóð sinni.“ Í tilkynningu frá utanríkisráðuneyti Panama var sagt að Afu hefði „haft hugrekki til að setja hagsmuni ríkisins og ímynd landsins ofar sínum eigin“ og að hann hefði „gert mistök“.

Myndir af Afu í bleikum kjól og með eyrnalokka birtust í fjölmiðlum í Panama. Málið þótti mikið hneyksli enda er þjóðin nokkuð íhaldssöm og 95% íbúa hennar kristnir. Ricardo Martinelli, forseti Panama, lagði orð í belg: „Hann hefði ekki átt að gera þetta.“

Ricardo Beteta, sem berst fyrir réttindum samkynhneigðra, sagði hins vegar að málið væri dæmi um fordóma gagnvart samkynhneigð í þjóðfélaginu. „Hér hefur það engar afleiðingar ef þú ert þjófur, lygari eða svikari en ef þú ert klæðskiptingur, samkynhneigður eða samkynhneigð, þá er það ekki liðið “

Utanríkisráðherrann Juan Carlos Varela spurði á mánudag: „Gat hann ekki klætt sig eins og sjóræningi eða sjóliði, jafnvel sem Andrés önd?“


mbl.is
Fleira áhugavert
Fleira áhugavert