Vopnaðir lögreglumenn í Moskvu, höfuðborg Rússlands, réðust í dag inn í höfuðstöðvar Strategy 31, aðgerða- og mótmlæendahóps sem andvígur er stjórnvöldum í landinu. Hópurinn hafði ætlað að standa fyrir mótmælum á morgun en lagt hafði verið bann við þeim.

Hópurinn kemur saman til mótmæla 31. dag hvers mánaðar sem hefur svo marga daga til að minna á og standa vörð um rétt manna til að safnast saman friðsamlega og vopnlausir. Réttur þessi er verndaður í 31. gr. stjórnarskrá Rússlands.

„Lögreglumenn ruddust inn á skrifstofuna, brutu glugga, án þess að sýna nokkra pappíra. Þetta voru fimmtán til tuttugu manns, sumir í einkennibúningum en aðrir í almenningsklæðnaði,“ sagði Alexander Averin, talsmaður The Other Russia-hreyfingarinnar. Fjórir meðlimir Stragety 31 voru á staðnum og hefur ekki náðst samband við þá eftir aðgerðir lögreglu að sögn Averin.

Mótmælunum á morgun var ætlað að fara fram á Triumfalnaja Ploshsjad-torgi í Moskvu og hafa stjórnvöld girt það af. Ætluðu meðlimir Stragety 31 að virða bann yfirvalda að vettugi og rifu girðingar á torginu niður í morgun. Er talið að aðgerðir lögreglu hafi komið til vegna þessa. Heimilað hafði verið að halda mótmælin á Púskín-torgi borgarinnar.

Rússnesk yfirvöld handtóku tuttugu manns á síðustu mótmælum Strategy 31 sem fram fóru 31. janúar. 500 mótmælendur voru þar saman komin en meðal þeirra var Boris Nemtsov, fyrrum varaforsætisráðherra landsins. Stjórnvöld höfðu ekki heimilað samkomuna.