Stormasamt getur veirð í stjórnmálunum. Harper með konu sinni á leið á stjórnmálafund í Charlottetown á Játvarðseyju í gær. reuters

Fari Íhaldsflokkurinn með sigur af hólmi í þingkosningunum í Kanada 2. maí næstkomandi heitir Stephen Harper leiðtogi hans og forsætisráðherra að uppræta allar opinberar greiðslur til stjórnmálaflokka.

Michael Ignatieff, leiðtogi Frjálslynda flokksins, sem er í stjórnarandstöðu, segir  áform Harpers í anda  bandarískra stjórnmálaflokka sem standi og falli með risaframlögum fyrirtækja.

Síðustu skoðanakannanir benda til að Íhaldsflokkurinn fari með sigur af hólmi í þingkosningunum og geti jafnvel hlotið þingmeirihluta einn og sér.

„Skattgreiðendur eiga ekki að þurfa að styrkja stjórnmálaflokka sem þeir styðja ekki,“ sagði Harper við fréttamenn á kosningaferðalagi í bænum Moncton í Nýju-Brunswick, í gær.

Hann sagði að í mánuði hverjum streymdu risafjárhæðir úr ríkissjóði til stjórnmálaflokka óháð því hvort þeir hefðu reynt að afla sér fjár sjálfir eður ei.

Í stjórnartíð Jean Chretiens, þáverandi leiðtoga Frjálslynda flokksins, var því fyrirkomulagi komið á árið 2004, að sérhver flokkur fær árlega úr ríkissjóði sem nemur tveimur dollurum á hvert atkvæði sem hann hlaut í síðustu kosningum.

Harper segir að þetta fyrirkomulagi bjóði upp á kosnignar ótt og títt því flokkarnir eigi alltaf nóg fyrir herkostnaðinum sem því fylgir. Kosningarnar í maí verða þær fjórðu á aðeins sjö árum.

Stephen Harper hefur verið forsætisráðherra í minnihlutastjórn sem Íhaldsflokkurinn hefur leitt frá kosningum árið 2006.