Bosiljka Mladic, eiginkonu bosníu-serbneska hershöfðingjans Ratko Mladic, sem er efstur á lista eftirlýstra stríðsglæpamanna Evrópu, hefur verið stefnt fyrir dómstóla fyrir ólöglega vopnaeign. Í réttarsal í Belgrad í dag sagðist hún telja að eiginmaður hennar væri ekki lengur á lífi.

„Ef hann er á lífi þá hefði hann fundið einhverja leið til að hafa samband við okkur," hefur BBC eftir henni. Ratko Mladic hefur verið á flótta undan stríðsglæpadómstól Sameinuðu þjóðanna síðan 1995, en hans bíða ákærur fyrir þjóðarmorð í Bosníustríðinu.

Því hefur verið haldið fram að Mladic fari huldu höfði í Serbíu og njóti þar verndar fyrrum félaga sinna í hernum. Serbneska ríkisstjórnin neitar því þó alfarið. Árið 2008 gerði lögregla húsleit á heimili Mladic fjölskyldunnar og fannst þá sjálfvirkur rifill og nokkrar skammbyssur. Bosiljka Mladic fullyrðir að vopnin séu í eigu eiginmanns hennar og hvorki hún né börnin hafi nokkurn komið nálægt þeim, að hans skipan.  

Hún sagði jafnframt að Mladic hefði flúið að heiman árið 2001 þegar bandamaður hans, Slobodan Milosevic fyrrum forseti Serbíu, var handtekinn. Fyrir þann tíma hafi hann þrisvar fengið heilablóðfall og gæti því ekki lifað án læknisaðstoðar. Fjölskyldan hefur barist fyrir því að fá að skrá hann formlega látinn, en það hefur ekki fengist.