Bandaríkin greindu í dag frá alvarlegum mannréttindabrotum í Norður-Kóreu, þar á meðal morð á ungbörnum og fyrirskipunum stjórnvalda til landamæravarða um að skjóta flóttamenn til bana.

Þetta kemur fram í árlegri mannréttindaskýrslu utanríkisráðuneytis Bandaríkjanna. Þar er bent á ýmis mannréttindabrot í kommúnistaríkinu, en jafnframt tekið fram að erfitt sé að staðfesta réttmæti þeirra fyllilega þar sem að mestu er byggt á vitnisburði annarra, enda hafa Bandaríkjamenn lítinn sem engan aðgang að Norður-Kóreu.

Í skýrslunni segir að það sé stefna yfirvalda Norður-Kóreu að taka af lífi hvern þann sem gerir tilraun til að flýja landið, yfirleitt yfir landamærin til Kína. Jafnframt segir að ekki sé hægt að staðfesta hve margir kunni að hafa látið lífið með þeim hætti. „Landamæraverðir hafa að sögn þau fyrirmæli að skjóta  til bana þá sem reyna að flýja og fangavörðum er jafnframt skipað að skjóta hvern þann sem reynir að sleppa úr pólitískum fangabúðum," segir í skýrslunni.

Konur sem sendar eru aftur til Norður-Kóreu, oft eftir mansal til Kína, eru þvingaðar í fóstureyðingar eða börn þeirra drepin í fæðingu, samkvæmt skýrslunni. „Flóttamenn sem tekst að sleppa frá Norður-Kóreu greina enn frá því að fjöldi fanga deyi þar af völdum pyntinga, sjúkdóma, hungurs, slæmum aðbúnaði eða öllu ofangreindu."

Utanríkiráðuneytið bandaríska segir jafnframt að enginn árangur hafi náðst í baráttunni fyrir því að fá lausa japanska borgara sem rænt var af Norður-Kóreumönnum á 8. og 9. áratugnum í því skyni að þjálfa þá sem njósnara. Þá segir að í landinu séu verulegar hömlur á tjáningarfrelsi almennings, þar á meðal internetinu. Þrátt fyrir allt segir í skýrslunni að svo virðist nú sem um 300.000 íbúar Norður-Kóreu eigi farsíma. Þeir megi þó ekki hringja út fyrir landssímana og mega eiga von á refsingum noti þeir leyfislausa kínverska síma.