Fjarstýrt vélmenni inni í kjarnorkuverinu í Fukushima. Reuters

Fjarstýrð vélmenni hafa verið send inn í Fukushima Daiichi kjarnorkuverið í Japan til að mæla geislun í verinu. Samkvæmt mælingum í tveimur kjarnakljúfum þá eru aðstæður þar hættulegar fólki.

Það gerir björgunaraðgerðir á vettvangi flóknari, en unnið hefur verið að því að koma á jafnvægi í verinu.

Rafmangsveita Tókýó (TEPCO), sem rekur kjarnorkuverið, greindi frá því í gær að það gæti náð tökum á ástandinu í verinu í lok þessa árs, að því er segir á vef BBC.

Það skemmdist mikið í jarðskjálftanum 11. mars sl. og flóðbylgjunni sem fylgdi í kjölfarið. Kælikerfi skemmdust og lá við ofhitnun. Hefur björgunarmönnum enn ekki tekist að fara inn í kjarnakljúfabyggingar frá því slysið varð.

Vélmennin mældu í gær aukna geislun í kjarnakljúfum 1 og 3.

Samkvæmt nýrri skoðanakönnun er meirihluti Japana óánægður með það hvernig japönsk stjórnvöld hafa tekið á málum í kjölfar náttúruhamfaranna.  Þrjú dagblöð birtu niðurstöður könnunarinnar. Skv. þeim er þolinmæði Japana á þrotum.

Tveir þriðju hlutar landsmanna segjast styðja skattahækkanir til að greiða fyrir enduruppbyggingunni, sem er sögð kosta um það bil 300 milljarða dala. Það eru dýrustu náttúruhamfarir í sögunni.

Reuters