Fjölskylda manns, sem pakistanskar öryggissveitir eru sagðar hafa handtekið í kjölfar árásar Bandaríkjamanna á hryðjuverkaleiðtogann Osama bin Laden, vill að hann fái að snúa heim.

Fjölskyldan býr skammt frá húsinu þar sem bin Laden var skotinn til bana á sunnudagskvöld. Breska sjónvarpsfréttastöðin Sky segir, að eigandi landsins, þar sem húsið stendur, hafi verið handtekinn eftir að í ljós kom að bin Laden bjó þar. 

Stöðugt eru að koma fram nýjar upplýsingar um árás bandarísku sérsveitarmannanna á bin Laden. Arabíska sjónvarpsstöðin al-Arabiya hafði í dag eftir dóttur bin Ladens, sem var í húsinu þegar árásin var gerð, að faðir hennar hafi fyrst verið handtekinn en síðan hafi sérsveitarmennirnir skotið hann til bana. 

Jay Carney, talsmaður Hvíta hússins, sagði hins vegar að bin Laden hefði veitt mótspyrnu. Fréttamönnum var síðar sagt, að svo hafi virst sem bin Laden væri að teygja sig eftir vopni. Í ljós kom hins vegar að hann var óvopnaður. Hins vegar voru vopnaðir verðir í húsinu og það kom til skotbardaga.  

Carney sagði, að eiginkona bin Ladens hefði reynt að ráðast á sérsveitarmennina þegar þeir ruddust inn í herbergið þar sem bin Laden var. Konan fékk skot í kálfann en lét ekki lífið. Áður höfðu bandarískir embættismenn sagt, að bin Laden hefði reynt að nota eiginkonu sína til að skýla sér fyrir kúlum Bandaríkjamannanna.

Leon Panetta, forstjóri bandarísku leyniþjónustunnar CIA, sagði við sjónvarpsstöðina NBC í gærkvöldi, að myndir af líki bin Ladens yrðu á endanum birtar.