Birtir myndir af líkum í húsi bin Ladens
Reutersfréttastofan hefur birt myndir, sem teknar voru í húsi hryðjuverkaleiðtogans Osama bin Ladens í Pakistan um klukkustund eftir að bandarískir sérsveitarmenn réðust þar til inngöngu, drápu bin Laden og höfðu lík hans á burt með sér. Myndirnar sjást í meðfylgjandi myndbandi og er varað við þeim.
Á myndunum, sem Reuters keypti af pakistönskum embættismanni, sjást meðal annars blóðug lík þriggja manna. Tveir eru klæddir hefðbundnum pakistönskum klæðum en sá þriðji er í skyrtubol.
Reuters segist hafa gengið úr skugga um að myndirar sé ósviknar en falsaðar myndir hafa farið um netið frá því fréttir bárust af því að bin Laden hefði verið ráðinn af dögum. Á myndunum sést einnig flak einnar af fjórum þyrlum, sem bandarísku sérsveitarmennirnir komu í.
Barack Obama, Bandaríkjaforseti, ákvað í gær að myndir af líki bin Ladens yrðu ekki birtar. Þá ákváðu Hvíta húsið og bandaríska varnarmálaráðuneytið að veita ekki frekari upplýsingar um aðgerðirnar í Abbottabad en embættismenn höfðu áður veitt upplýsingar og komið fram með fullyrðingar, sem reyndust vera rangar og voru síðan leiðréttar.
Meðal annars sögðu talsmenn Hvíta hússins fyrst, að bin Laden hefði verið vopnaður þegar hann var skotinn til bana. Sólarhring síðar leiðrétti Jay Carney, talsmaður Hvíta hússins, þetta og sagði að bin Laden hefði verið óvopnaður.
Á mánudag sagði John Brennan, helsti ráðgjafi Baracks Obamas í hryðjuverkavörnum, að eiginkona bin Ladens hefði látið lífið þegar maðurinn hennar reyndi að skýla sér á bak við hana fyrir skothríð Bandaríkjamanna.
En embættismenn drógu þetta síðan til baka og Carney sagði á þriðjudag, að konan hefði ráðist á einn bandaríska sérsveitarmanninn. Hún hefði síðan særst en væri enn á lífi. Tveir sendiboðar, sem störfuðu fyrir bin Laden, hefðu hins vegar látið lífið og einnig óþekkt kona.
Þá hafa einnig komið fram misvísandi upplýsingar um fimmta manninn, sem lét lífið í árásinni. Upphaflega var hann sagður vera einn af sonum bin Ladens en Carney minntist ekki á hann á þriðjudag. Þegar Carney var spurður um málið í gær, miðvikudag, sagðist hann ekki geta staðfest neitt og vísaði á varnarmálaráðuneytið.Þar fengust engin svör.
Carney sagði, að upphaflegi misskilningurinn um að sonur bin Ladens hefði fallið stafaði af villu í útskrift. Carney viðurkenndi, að hann væri ekki með þetta á hreinu en ítrekaði, að stjórnvöld hefðu viljað koma eins miklum upplýsingum á framfæri og mögulegt var.
