Hermenn og liðsmenn öryggissveita stóðu vörð þar sem hópum kristinna og múslima lenti saman í Imbaba hverfi í Kaíró í dag. Reuters

Fjórir dóu og um tuttugu til viðbótar meiddust í hörðum átökum kristinna manna og múslima í Kaíró í Egyptalandi í dag. Hópunum lenti saman í Imbaba hverfi í norðvesturhluta borgarinnar eftir að múslimar réðust á koptíska kirkju.

Þeir kváðust ætla að leysa úr haldi kristna konu en sagt var að henni væri haldið þar gegn vilja sínum því hún vildi gerast múslimi.

Sóknarpresturinn Hermina sagði í samtali við AFP fréttastofuna að hinir látnu væru Koptar sem dóu þegar „rustar og (bókstafstrúaðir múslimar) Salafistar skutu á þá,“ í árásinni síðdegis á laugardag.

Fagnaðarerindið hafði verið lagt á lík sem vafið var í klæði inni í kirkjunni. Kirkjugólfið var atað blóði og sárir kristnir voru bornir inn í kirkjuna til aðhlynningar. 

Fyrir utan kirkjuna, sem er í fátæku hverfi verkafólks, var fjöldi herlögreglubíla til að halda múslímskum mótmælendum frá kirkjunni.

Þeir skutu af byssum sínum upp í loftið þegar kristnir menn, sem voru framan við kirkjuna, og múslímskir mótmælendur neðar á götunni grýttu hvorir aðra. Múslimarnir köstuðu einnig eldsprengjum og kveikti ein þeirra í íbúð nærri kirkjunni.

Koptísku mótmælendurnir söngluðu „ó, Guð! Ó, Jesús“. Þeir gagnrýndu hermennina fyrir að veita sér ekki næga vernd.

Hermina og aðrir vottar sögðu að múslimarnir hafi reynt að ráðast inn i kirkjuna fyrr í dag og fullyrti að kristna fólkið væri með múslimska konu í haldi. 

Farið var með hina særðu, sem bæði voru með beinbrot og skotsár, á fjögur sjúkrahús í borginni. 

Koptar eru 6-10% í búa Egyptalands en í landinu búa meira en 80 milljónir manna.