Gríðarlegur straumur flóttamanna hefur verið til Lampedusa og koma þeir á yfirfullum bátum. Myndin er ekki af bátnum sem strandaði í nótt en af öðrum sem komst til hafnar. Reuters

Bátur með um 500 líbíska flóttamenn innanborðs strandaði við ítölsku eyjuna Lampedusa snemma í morgun. Margir stukku fyrir borð en yfirvöld á eyjunni segja að öllum hafi verið bjargað.

Báturinn steytti á skeri þegar hann nálgaðist Lampedusa, sem er sunnan við Ítalíu. Mikil skelfing greip um sig um borð. Flestir voru farandverkamenn frá norðanverðri Afríku og Asíu sem búið höfðu í Líbíu.

Ítalska strandgæslan kom strax á vettvang og bjargaði fjölda fólks úr sjónum, þar á meðal konum og börnum. Einnig var unnið að björgun þeirra sem eftir voru um borð í bátnum.

Mikil örvænting ríkti á meðal fólksins eins og sjá mátti í sjónvarpsútsendingu þar sem fólk hélt dauðahaldi í línur sem strengdar voru milli bátsins og lands. 

„Það voru um 500 manns um borð. Þetta voru erfiðar aðstæður. Varðbátar okkar komust ekki nógu nærri vegna grunnsævis,“ sagði Antonio Morana, talsmaður ítölsku strandgæslunnar.