Bátur með flóttafólk.

Bátur með 72 afrískum flóttamönnum lenti í vandræðum á Miðjarðarhafinu með þeim afleiðingum að 61 flóttamaður lést úr hungri og þorsta. 11 komust lífs af eftir að bátinn rak að landi eftir 16 daga á sjó, en tveir þeirra létust skömmu síðar.

Þetta kemur fram í úttekt breska blaðsins Guardian í gær. Báturinn fór frá Trípolí í Líbíu 25. mars og var ferðinni heitið til ítölsku eyjarinnar Lampedusa. Um borð voru 72 farþegar, þar af 20 konur og tvö ungabörn. Eftir 18 tíma siglingu lenti áhöfnin í vandræðum og var haft samband við ítölsku strandgæsluna. Skömmu síðar kom herþyrla að bátnum, flugmennirnir sendi niður vatn og kex og  sögðu skipstjóranum að bíða eftir hjálp. Engin aðstoð barst og enginn kannast við að hafa sent þyrluna á vettvang. Haft er eftir talsmanni ítölsku strandgæslunnar að hún hafi tilkynnt yfirvöldum á Möltu að báturinn stefndi þangað auk þess sem skipstjórnarmönnum á svæðinu hafi verið beðnir um að svipast um eftir bátnum. Yfirvöld á Möltu kannast ekki við málið.

Engin aðstoð barst en skipstjórinn sagði farþegunum að hann kæmist til Lampedusa. 27. mars hafði hann tapað áttum og eldsneytið búið. „Það var ekkert eldsneyti eftir, enginn matur, ekkert vatn, það var ekkert eftir,“segir Abu Kurke, sem er 24 ára. „Báturinn var á reki við mjög hættulegar aðstæður.“

Undir lok mánaðarins var báturinn í grennd við herskip frá Nato. Tvær flugvélar flugu frá skipinu og hringsóluðu yfir bátnum þar sem flóttafólkið hélt á hungruðum börnunum og veifaði. Vélarnar flugu í burtu og báturinn fjarlægðist herskipið án þess að þaðan bærist nokkur hjálp. Guaardian telur að herskipið hafi verð Charles de Gaulle frá Frakklandi, en það hefur ekki fengist staðfest.

Talsmaður Nato segir að Nato hafi ekki fengið beiðni frá bátnum og engin gögn séu um atvikið en næstu 10 daga féllu flóttamennirnir frá hver af öðrum. „Þegar við vöknuðum á morgnana sáum við stöðugt fleiri lík,“ segir Kurke. „Undir það síðasta vissum við ekki hvrj við vorum, menn ýmist báðu eða dóu.“ Hann segist hafa lhaldið sér lifandi með því að drekka þvag sitt og borða tannkrem.

10. apríl rak bátinn að landi nálægt Zlitan í Líbíu, skammt frá Misrata.