Eldur hefur logað í Athenu í alla nótt. mynd/Kári P. Højgaard

Jón Pétur Jónsson

„Það var mikil sprenging um kl. tvö í nótt og svo fylgdu minni sprengingar í kjölfarið,“ segir hann. 

Mikinn reyk hefur lagt yfir Skálafjörð og hafa íbúar í nágrenninu yfirgefið heimili sín og verslunum verið lokað. Er fólk jafnframt hvatt til að halda sig innandyra.

Vindáttin er suðaustlæg og leggur reyk þvert yfir fjörðinn að bænum Skála og þar eru íbúar einnig búnir að yfirgefa heimili sín, eða um 800 manns.

Þá segir Højgaard að lögreglan sé búin að loka aðalveginum við Rúnavík og girða af svæði sem er í um 150 metra frá togaranum, en um borð í honum eru 18,5 tonn af ammoníaki.

Aðspurður segir hann að fólk sé almennt rólegt og bíði nú átekta á meðan slökkviliðið reyni að ná tökum á eldinum. En íbúarnir hafast nú við í skýli á vegum kirkjunnar í Nesvík. „Á meðan það logar í skipinu þá stöndum við frammi fyrir vanda. Sumir hafa sagt að það sé nauðsynlegt að draga skipið út úr firðinum, en vandamálið er að komast um borð í skipið og koma taug yfir í það.“

Mjög erfiðlega hefur gengið að ráða niðurlögum eldsins enda mikill hiti í skipinu og hefur slökkviliðsmönnum ekki tekist að fara um borð. Í nótt var reykurinn svo mikill að menn sáu ekki handa sinna skil. Staðan skánaði aðeins í morgun og að sögn Højgaard reyna menn nú að koma vír yfir í skipið svo það fljóti ekki af stað.

Þrír voru um borð í skipinu þegar eldurinn kviknaði í gærkvöldi. Þeir voru fluttir á sjúkrahús en grunur leikur á að þeir hafi orðið fyrir reykeitrun. Aðra hefur ekki sakað.

Þetta er í þriðja sinn sem eldur kviknar í Athenu. Verið var að vinna í skipinu þegar eldur kviknaði. Skipið logar stafnanna á milli og ljóst þykir að það muni ekki sigla framar.