„Ráðist á LA, ekki bara New York“
Osama bin Laden Reuters
Þrátt fyrir að hafa verið hundeltur af færustu leyniþjónustum heims árum saman, virðist Osama bin Laden hafa verið potturinn og pannan í öllum hryðjuverkaáformum al-Qaida samtakanna.
Þetta kemur fram í dagbókum hans og öðrum skjölum sem fundust í híbýlum hans.
Meðal ráðlegginga bin Ladens til samverkamanna sinna í al-Qaida var: „Ráðist á Los Angeles, ekki bara New York. Ráðist á lestir, jafnt sem flugvélar. Ef mögulegt, látið til skarar skríða á hátíðisdögum eins og 4. júlí og þegar tíundu ártíðar árásanna á tvíburaturnana verður minnst þann 11. september 2011.“
Hvatti til fjöldamorða
Umfram allt hvatti hann til þess að myrða sem flesta Bandaríkjamenn í einni og sömu árásinni, en það ætti að halda þeim í burtu frá Arabaheiminum.
Þetta sýnir fram á að flestar leyniþjónustur vanmátu áhrif hans og hvað hann gegndi stóru hlutverki innan al-Qaida. Margir höfðu talið að hann yrði áhrifalaus, eftir að hann var hrakinn í einangrun.
Einnig fundust í skjölum hans áætlanir um að ráðast á vinsæla ferðamannastaði og sendiráð í Evrópu á síðasta ári, en bandaríska leyniþjónustan hafði komist á snoðir um þessa áætlun og ekkert varð af árásinni.
Vistaði samskipti á tölvudrif
Leit á heimili bin Ladens leiddi í ljós að hann var í miklum samskiptum við al-Qaida víða um heim, þar á meðal í Jemen, sem hefur verið mikil ógn við Bandaríkin. Hann virðist hafa verið vel upplýstur um aðferðir Bandaríkjanna til að verjast hryðjuverkum og lagði lærisveinum sínum línurnar um hvernig ætti að komast hjá hryðjuverkavörnum.
Í fórum hans fundust útreikningar um hversu marga Bandaríkjamenn þyrfti að drepa þangað til Bandaríkin neyddust til að draga herafla sinn úr Arabaheiminum. Hann leiðir að því líkum að það þurfi að drepa þúsundir til að ná þeim árangri.
Einnig var bin Laden með áætlanir um hvernig etja mætti bandarískum stjórnmálamönnum á móti hvorum öðrum og skapa þannig vantraust.
Bin Laden átti samskipti með því að vista þau á tölvudrif. Drifin voru síðan flutt til og frá heimili hans. Þetta mun vera fremur seinlegur samskiptamáti, en afar öruggur og erfitt að rekja slík samskipti.
Óvissa með nýjan leiðtoga
Ekki hefur verið staðfest hver verður nýr leiðtogi al-Qaida samtakanna, en líkum hefur verið leitt að því að það verði Ayman al-Zawahri, sem hefur verið hægri hönd hans.
Al-Qaida hefur vaxið fiskur um hrygg víða í Arabaheiminum, til dæmis er hreyfingin í Jemen orðin öflugasta al-Qaida hreyfingin sem þekkt er, bæði hvað varðar vopnabúnað og mannafla.
Stjórnmálaskýrendur hafa velt því fyrir sér hvort al-Zawahri takist að halda utan um hreyfinguna, en áhersluatriði al-Qaida eru afar mismunandi eftir löndum, til dæmis vinna hreyfingarnar í Sómalíu og Alsír á gjörólíkan hátt.
Myndirnar geymdar hjá CIA
Breskir embættismenn segja að Bandríkjamenn hafi deilt með þeim ýmsum upplýsingum um fylgsni bin Ladens, en að þar hafi ekki verið neinar haldbærar sannanir um að hann hafi átt þátt í hryðjuverkaárásum þar í landi á undanförnum árum.
Barack Obama Bandaríkjaforseti hefur fyrirskipað að myndir af líki bin Ladens eigi ekki að koma fyrir almenningssjónir. Þær eru geymdar í höfuðstöðvum CIA og bandarískir þingmenn munu hafa streymt þangað í stórum stíl til að skoða þær.
