1600 „fullir hálfvitar" handteknir

Lögregla í Ástralíu skar um helgina upp herör gegn drykkjumenningunni, sem viðgengst víða í landinu. Alls voru um 1600 manns handteknir í tveggja daga aðgerðum lögreglu og ákærðir fyrir ýmis afbrot sem tengjast áfengisneyslu.

Flestir voru handteknir í New South Wales og  í Vestur-Ástralíu. Í mörgum tilfellum voru hinir handteknu ákærðir fyrir brot gegn valdstjórninni. Aðrir voru meðal annars ákærðir fyrir ölvunarakstur, fyrir að kasta af sér vatni á almannafæri, og að hlýða ekki fyrirskipunum lögreglu.

Lögreglusamband New South Wales segir að ringulreið og stjórnleysi sé ríkjandi í áströlskum borgum um allar helgar vegna almennrar áfengisneyslu. Grípa þurfi til nýrra aðgerða til að ráðast að rótum vandans. 

„Aðgerðin hefur sannað, að við höfum misst stjórn á áfengisneyslu og ofbeldi og að fullir hálfvitar ganga lausir um allt land," sagði Pat Gooley, formaður sambandsins í tilkynningu. „Við þurfum á að halda heildstæðri stefnu til að takast á við ofbeldisverk sem rekja má til áfengisneyslu - stefnu þar sem ráðist er að rótum vandans en ekki einkennum hans."  

Nú er vetur að ganga í garð í Ástralíu en lögregla segir að ekkert lát sé á fjöldadrykkjunni þrátt fyrir kólnandi veður.  

• 1 blogg um fréttina

Bloggað um fréttina

• Steinar Þorsteinsson: Dionysus víða tignaður.