Leiðtogar Evrópuríkja þrýsta á um það að annar Evrópumaður taki við af Dominique Strauss-Kahn sem framkvæmdastjóri Alþjóðagjaldeyrissjóðsins. Rætt hefur verið um hvort næsti framkvæmdastjóri ætti að vera frá þróunarlandi, en Angela Merkel kanslari Þýskalands sagði í dag að þörf væri á Evrópumanni, í ljósi þeirra erfiðleika sem evrusvæðið glímir við.

Strauss Kahn sagði af sér í dag í kjölfar mikils alþjóðlegs þrýstings vegna ákæru á hendur honum um kynferðisofbeldi. Sérfræðingar segja að framundan sé hörð barátta um framkvæmdastjórastólinn. Fram kemur á BBC að margir telji að AGS þurfi að endurspegla vaxandi áhrifamátt þróunarlanda á uppleið. Angela Merkel, sem leiðir stærsta hagkerfi Evrópu, segist hinsvegar styðja Evrópumann til verksins. Jose Manuel Barroso forseti framkvæmdastjórnar Evrópusambandsins er sama sinnis og segir að í ljósi þess að ESB láti mest af hendi rakna til AGS sé eðlilegt að Evrópuþjóðir komi sér saman um sterkan og hæfan stjórnanda.

Suður-Afríka, Brasilía og Mexíkó eru hinsvegar meðal landa með vaxandi hagkerfi sem telja að láta þurfi af þeirri hefði að Evrópumenn fari með stjórn sjóðsins. Kínverjar og Bandaríkjamenn hafa einnig tjáð sig um málið og leggja áherslu á að ferlið við að finna nýjan framkvæmdastjóra þurfi að vera gagnsætt og sanngjarnt.

Að sögn BBC eru sterkustu kandídatarnir taldir vera Christine Lagarde, fjármálaráðherra Frakklands, Peer Steinbrueck fyrrum fjármálaráðherra Þýskalands, Axel Weber fyrrum seðlabankastjóri Þýskalands, Kemal Dervis fyrrum efnahagsráðherra Tyrklands, Trevor Manuel fyrrum fjármálaráðherra Suður-Afríku, Agustin Carstens seðlabankastjóri Mexíkó, Gordon Brown fyrrum forsætisráðherra Bretlands, Stanley Fischer fyrrum seðlabankastjóri Ísraels og Montek Singh Ahluwlia, fyrrum fjármálaráðgjafi forsætisráðherra Indlands.