Konur eru minna metnar en karlar á Indlandi. Reuter

Fjórum til tólf milljón kvenkyns fóstrum var eytt á Indlandi á árunum 1980 til 2010 en foreldrar þar í landi, sem eiga stúlku fyrir, kjósa nú í síauknum mæli að binda enda á meðgöngu, beri konan stúlkubarn undir belti.

Þetta eru niðurstöður rannsóknar sem birtist í The Lancet í morgun en þar kemur m.a. fram að stúlkur á aldrinum 0-6 ára eru nú rúmum sjö milljónum færri en drengir á sama aldri. 

Þessa þróun rekja höfundar rannsóknarinnar m.a. til þess að enn þykir eftirsóknarverðara að eignast syni en dætur og að frjósemi þjóðarinnar hefur farið minnkandi en konur eignast nú að meðaltali um 2,6 börn samanborið við 3,8 börn árið 1990.

Löggjöf til að koma í veg fyrir mismunun af þessu tagi er mjög víða virt að vettugi og óttast er að ef frjósemi þjóðarinnar minnkar enn muni foreldrar í auknum mæli kjósa að eyða kvenkyns fóstrum, jafnvel þó um fyrsta barn sé að ræða.

Á Indlandi búa nú 32 milljónum fleiri drengir en stúlkur. Í Kína, þar sem drengir þykja einnig eftirsóttari en stúlkur, eru 94% einhleypinga á aldrinum 28-49 karlmenn.