Barack Obama, forseti Bandaríkjanna, ræddi við blaðamenn ásamt David Cameron, forsætisráðherra Bretlands, í London í dag. Reuters

Barack Obama Bandaríkjaforseti viðurkenndi í dag að það sé takmörkunum háð að enginn landher á vegum NATO sé í Líbíu. Hingað til hefur NATO aðeins gert loftárásir á skotmörk í landinu. Obama segir hins vegar að stöðugur þrýstingur á Gaddafi Líbíuleiðitoga muni leiða til þess að hann fari frá.

Obama, sem er nú staddur í opinberri heimsókn í Bretlandi, hefur verið gagrýndur í Evrópu fyrir þá afstöðu sína að takmarka aðild bandarískra hersveita í Líbíu. Þar hafa Bretar og Frakkar verið í aðalhlutverki. Obama sagði aftur á móti við blaðamenn að hernaðaraðgerðirnar í Líbíu miðuðu í rétta átt.

„Þegar það er búið að útiloka hersveitir á jörðu niðri, þá eru aðgerðir okkar úr lofti takmörkunum háðar,“ sagði Obama á sameiginlegum blaðamannafundi með David Cameron, forsætisráðherra Bretlands, í dag.

„Þetta þýðir að stjórnarandstæðingar á jörðu niðri í Líbíu verða að sinna sínum skyldum,“ segir Obama og bætir við að hann muni ekki setja tímamörk á aðgerðir NATO í Líbíu.

„Þetta verður hægt og stöðugt ferli sem mun gera okkur kleift að þreyta hersveitir stjórnarinnar og breyta pólitískum áætlunum ríkisstjórnar Gaddafis, þar til hún áttar sig á því að hún mun ekki stjórna landinu.“

Obama segir að ákveðinn skriðþungi sé kominn í aðgerðirnar. Nái menn að viðhalda þessum þrýstingi þá muni það leiða til þess að Gaddafi muni stíga til hliðar.

Cameron bað menn einnig um að sýna biðlund og vera þolinmóðir.

„Ég er einnig sammála tveimur lykilatriðum, sem eru þolinmæði og þrautsegja. Það er bandalagið að sýnda og verður að halda því áfram,“ sagði Cameron.