Mótmælendur miskunnarlaust barðir
Mótmælendur og lögregla takast á á Katalóníu-torgi í Barcelona í gær. Reuters
Spænska héraðslögreglan í Katalóníu á Spáni hefur beitt mikilli hörku gegn miklum mótmælum gegn efnahagsástandinu sem staðið hafa yfir undanfarið þar og víðar í landinu.
Til mikilla átaka kom í gær á milli mótmælenda og lögreglunnar í Barcelona á Katalóníu-torgi og skutu lögreglumenn meðal annars gúmmíkúlum að þeim. 84 mótmælendur slösuðust í átökunum og 37 lögreglumenn. Ekki er vitað hversu alvarleg meiðslin voru. Þá voru margir mótmælendur handteknir.
Arnar Ingi Viðarsson, sem stundar nám í Barcelona, segir viðbrögð spænsku lögreglunnar hafa verið mjög harkaleg og fólk hafi miskunnarlaust verið barið með kylfum. Hann hafi verið á torginu í gær og reynt að taka myndir en óttast um myndavélina þar sem lögreglan hafi tekið myndavélar af fólki, sem ekki var frá stórum fjölmiðlum og merkt sem slíkt, og eyðilagt þær.
Hér má sjá myndband frá því í gær af átökum mótmælenda og lögreglu í Barcelona.
