Herman van Rompuy, forseti leiðtogaráðs ESB. Reuters

Forystumenn Evrópusambandsins og Japans hafa lýst yfir stuðningi við að samið verði um fríverslun þar á milli. Hins vegar eru fulltrúar sambandsins mjög á verði gagnvart Japönum og vilja að samið verði sérstaklega um það hvernig viðræðurnar fari fram áður en þær hefjast. Hafa þeir gefið þá skýringu á þessum kröfum að Japanir séu snillingar í að semja um einhliða fríverslun sér í hag og því sé nauðsynlegt að hafa varann á.

Ákveðið var að hefja undirbúning fyrir fríverslunarviðræður á fundi sem fram fór um helgina í útjaðri Brussel. Náttúruhamfarirnar í Japan fyrr á þessu ári, þar sem flóðbylgja skall á landinu í kjölfar jarðskjálfta, og efnahagserfiðleikar í kjölfar þeirra urðu til þess að forystumenn ESB ákváðu að opna á mögulega fríverslun við Japani. 

Viðskipti á milli Japan og ESB eru þegar mikil eða sem nemur 110 milljörðum evra á ári. Hins vegar hafa þau dregist saman um 30% á undanförnum áratug og hafa stjórnvöld í Tókýó áhyggjur af því japönsk fyrirtæki eigi eftir að tapa viðskiptum í ríkjum sambandsins til samkeppnisaðila í Suður-Kóreu en ESB gekk nýverið frá fríverslunarsamningi við þarlend stjórnvöld.

Forseti leiðtogaráðs ESB, Herman van Rompuy sagðist bjartsýnn á útkomuna í samtali við fréttavefinn Euobserver.com en lagði áherslu á að enn væri langt í land.