Frá Stokkhólmi, höfuðborg Svíþjóðar.

Sænskur karlmaður frá Växjö í Svíþjóð var í dag dæmdur í 16 ára fangelsi í héraðsdómi fyrir að myrða 17 ára stúlku. Maðurinn hélt því fram að stúlkan hefði látist fyrir slys og að kynlífleikur sem þau hafi verið í hafi gengið of langt.

Verjandi mannsins sagði niðurstöðuna bæði góða og slæma. Maðurinn var ákærður í febrúar fyrir að nauðga stúlkunni, myrða hana og fyrir illa meðferð á líki hennar. Hins vegar var fallið frá nauðgunarkærunni fyrir dómi og dómurinn féllst ekki á að maðurinn yrði dæmdur í lífstíðarfangelsi eins og saksóknari hafði krafist.

Stúlkan, sem gengur undir nafninu Johanna í umfjöllun sænskra fjölmiðla, fannst látin í skóglendi fyrir utan Lindshammar í suðvesturhluta Svíþjóðar eftir að mikil leit hafði verið gerð að henni. Johanna hafði kynnst manninum í gegnum internetið og tjáð honum aðhana langaði að verða fyrirsæta en maðurinn taldi henni trú um að hann væri ljósmyndari.

Innihald tölvu mannsins sýndi að hann hafði ennfremur verið í sambandi við fjölda annarra kvenna og að í mörgum tilfellum hafi hann haldið því fram að hann væri fulltrúi tískuhúsa sem vildi taka af þeim myndir.

Rannsóknir réttarmeinafræðinga sýndu fram á að Johanna hafði verið kyrkt í íbúð mannsins og lík hennar síðan skilið eftir þar sem það fannst. Dómurinn féllst ekki á þér útskýringar mannsins að um slys hafi verið að ræða en hann batt rafmagnsvír um hálsinn á henni á meðan þau stunduðu kynlíf.

Maðurinn var þess í stað dæmdur fyrir morð að yfirlögðu ráði og til greiðslu skaðabóta til ættingja stúlkunnar. Verjandi hans sagði hugsanlegt að dóminum yrði áfrýjað.